Футбол бўйича Ўзбекистон миллий терма жамоаси бош мураббийи Сречко Катанец чоршанба куни бўлиб ўтган матбуот анжуманида КХДРга қарши бўлиб ўтадиган ЖЧ-2026 саралаш босқичи 3-тур учрашуви ҳақида фикр билдирди. Биринчи давра баҳси 5 сентябрь куни соат 19:00 да Тошкентдаги «Бунёдкор» стадионида бўлиб ўтади.
«Барчаси жойида, футболчиларимиз ўйинга тайёр. Кечаги машғулотда ҳам жамоамиз диққат ва эътибор билан ўйинга тайёргарлик кўрди. Биз ўз уйимизда ўйнаймиз, шу сабабли мақсадимиз — фақат ғалаба қозониш. 3 йилдан буён жамоа билан биргамиз ва бу борада етарлича кўникмага эгамиз. Йигитлар мен улардан нима сўраётганимни билишади…», — деди у.
Унинг айтишича, у жамоанинг жаҳон чемпионатига чиқиш истаги билан ҳаддан ташқари тўлиб-тошиб кетмаслигини кутмоқда.
«Ҳамманинг Ўзбекистон терма жамоаси нима учун ҳеч қачон жаҳон чемпионатига саралашдан ўта олмаганини муҳокама қилаётганини эшитяпман. Ўйинчилар билан суҳбатлашдим. Ҳаддан ташқари руҳланиб кетиш ҳам, етарли даражада руҳлана олмаслик ҳам яхши эмас. Биз хотиржам бўлишимиз, аввалгидек ўз ишимизни бажаришимиз лозим, чунки бу босқичда ҳар бир ўйин мураккаб кечади. Ушбу босқичда энг кучли жамоалар, шу жумладан, КХДР терма жамоаси ҳам тўпланган», — дея қайд этди 61 ёшли словениялик мутахассис.
Сречко Катанецнинг таъкидлашича, терма жамоа Шимолий Кореяга қарши ўйинда ўзининг энг яхши ўйинини кўрсатишга ҳаракат қилади ва «жаҳон чемпионатига қадам-бақадам боради».
Шунингдек, мураббий КХДРни таҳлил қилиш қийинлигини, чунки Япония ва Сурияга қарши ўйинларда жамоа турли таркибларда ўйнаганини таъкидлади.
«Бу яхши интизомга эга жамоа, улар мураббий кўрсатмаларига қатъий амал қилишади, ҳужум ва қарши ҳужумларда ҳам яхши. Аммо биз ўз ўйинимизга эътибор қаратамиз. Биз уйда ўйнаймиз, биз яхшироқмиз, буни биламиз, лекин буни эртага майдонда кўрсатишимиз керак», — деди мураббий.
Терма жамоа сардори Элдор Шомуродовнинг айтишича, «биз узоқ кутган энг муҳим босқич бошланмоқда».
«Бизнинг мақсадимиз бор ва унга эришиш учун ҳамма нарсани қиламиз. Аввалги цикллар давомида ёш футболчи сифатида қатнашганмиз ва тажрибали футболчилар билан бирга ҳаракат қилганмиз. Бироқ бу гал энди масъулият ўзимизда, ўрганган тажрибаларимизни ишга солишимиз керак. Бизда тайёргарлик учун етарлича вақт бўлди. Хатолар устида ишлаб бордик. Барчамиз бир оила бўлиб, биргаликда асосий вазифани бажаришга ишонамиз», — деди италиялик «Рома» ҳужумчиси.
Эслатиб ўтамиз, Жаҳон чемпионатининг учинчи саралаш босқичида 18 та жамоа олтита терма жамоадан иборат учта гуруҳга бўлинган. Гуруҳдаги энг яхши икки жамоа тўғридан-тўғри ЖЧ-2026 финал босқичига йўл олади. Учинчи ва тўртинчи ўринларни эгаллаган жамоалар тўртинчи раундда яна иккита тўғридан-тўғри йўлланма, шунингдек, қитъалараро плей-офф ўйинида ўйнайди.
Учинчи саралаш босқичи икки босқичда (10 тур) ўтказилади. У 2024 йил 5 сентябрда бошланади ва 2025 йил 10 июнда якунланади.
Ўзбекистон «А» гуруҳидан жой олган, у ерда жамоа Эрон, Қатар, БАА, Қирғизистон ва КХДР билан ўйнайди.
