Ўзбекистон президенти Шавкат Мирзиёев 30 август куни 2024−2030 йилларда давлат-хусусий шерикликни ривожлантириш чора-тадбирлари тўғрисидаги қарорни имзолади.
Ҳужжатда йўл, энергетика, таълим, транспорт, коммунал, сув, экология ва бошқа соҳаларда амалга оширилиши режалаштирилган ДХШ лойиҳалари санаб ўтилган.
Хусусан, сентябрь ойида Тошкент-Самарқанд пулли йўлини қуриш бўйича энг яхши таклифларни танлаб олиш бўйича тендер эълон қилиниши режалаштирилган.
Декабрь ойида пудратчини аниқлаб, у билан шартнома тузиб, қурилишни бошлаш режалаштирилган. Ишларни 2028 йил охиригача якунлаш, кейин эса бошқарувни давлат-хусусий шериклик асосида хусусий операторга ўтказиш режалаштирилган. Дастлабки қиймати 2,2 миллиард долларни ташкил этади.
Шунингдек, Жаҳон банки кўмагида 303 км узунликдаги Тошкент-Андижон пулли йўлини қуриш режалаштирилган. Май ойида Тошкент халқаро инвестиция форумида транспорт вазири ўринбосари Жасурбек Чориев Тошкент-Андижон йўналишидаги пулли автомобиль йўлининг нархи 4,65 миллиард долларига баҳоланаётганини маълум қилганди.
Октябрь ойида лойиҳа концепциясини ишлаб чиқиш ва тасдиқлаш, 2025 йил март ойида тендернинг биринчи босқичини ўтказиш, октябрь ойида тендернинг иккинчи босқичини ўтказиш, 2026 йил апрель ойида ғолибни эълон қилиш ва у билан ДХШ шартномасини тузиш режалаштирилган.
Тошкент-Андижон пулли автомобиль йўли лойиҳаси 2019 йилдан буён муҳокама қилинмоқда. 2021 йилда унинг қиймати 2 млрд доллардан ошиши хабар қилинганди. Сўнгра Жаҳон банки вакиллари автомагистралдан енгил автомашиналарнинг фойдаланиш нархи сўм эквивалентида 5−7 доллар, юк машиналари ва автобуслар учун эса сўм эквивалентида 15 долларга тенг бўлишини ҳисоблаб чиққан.
Транспорт соҳасидаги лойиҳалар орасида 2027−2030 йилларда Самарқанд ва Бухоро ўртасида 1 миллиард долларлик пулли йўл қурилиши ҳам бор.
Бундан ташқари, «Тахтақорача» довонида пулли туннель қурилиши режалаштирилган. Йил якунига қадар салоҳиятли стратегик компаниялар билан музокаралар олиб бориш, 2025 йил августига қадар лойиҳа концепциясини тасдиқлаш, 2026 йил февралига қадар хусусий шерикни танлаш, 2026 йил декабрига қадар ДХШ шартномасини имзолаш топширилди.
Лойиҳанинг қиймати 100 миллион долларга баҳоланмоқда. Унинг узунлиги, аввал хабар қилинганидек, 4,4 км бўлиши керак. Ўтган йилнинг октябрь ойида президент Шавкат Мирзиёев туннель қурилиши 2024 йилда бошланишини айтган эди.
2025 йил охирига қадар Чирчиқ шаҳрида 60 миллион долларлик асфальтбетон қопламали янги ҳалқа йўли (4P5 ва 4K755A йўлларини боғлаш учун) қурилиши режалаштирилган.
«А378-Қарши» автомобиль йўлининг Самарқанд-Қарши йўналиши бўйича 3−52 км (узунлиги 49 км) қисмини цемент-бетон қопламали реконструкция қилиш режалаштирилган. Лойиҳа қиймати 75 млн долларга баҳоланиб, 2028 йил охиригача амалга оширилади.
