Ўзбекистон делегациясининг 15 ёшли аъзоси Шаҳина Йигиталиева Паралимпия ўйинларининг кумуш медалини олди.
6 сентябрь куни пара енгил атлетика бўйича аёллар ўртасида F46 классида (бир ёки иккала қўл ҳаракати ўртача даражада нуқсонланган ёки оёқ-қўллари йўқ дала спортчилари қатнашади) найза улоқтириш дастурида финал баҳси якунланди. Ўзбекистонлик спортчи 43,12 метр натижа билан иккинчи ўринни қайд этди.
Биринчи ўринни 43,77 метр натижа билан венесуэлалик Морилло Гил Наибис Даниела қўлга киритди. Учинчи ўрин эса буюк британиялик Арнольд Ҳоллига насиб қилди (40,59 метр).
Шаҳина Йигиталиева Ўзбекистон таркибидаги энг ёш спортчи ҳисобланади. У 2008 йил 16 октябрда туғилган.
Бундан ташқари, ушбу йўналишда қатнашган яна бир Ўзбекистон вакили Розия Эргашева 35.98 метр натижа билан 9-ўринни эгаллади.
Йигиталиеванинг натижаси орқали делегация ҳисобидаги медаллар сони 23 тага етди — 9 та олтин, 8 та кумуш, 6 та бронза. Ўзбекистон хабар эълон қилинган вақтда онлайн медаллар жадвалида 12-ўринда жойлашган.
