Ўзбекистонда коррупцияга оид жиноятларни содир этишда айбдор деб топилган шахсларнинг очиқ электрон реестрини жорий этиш тўғрисидаги қонун лойиҳаси сентябрь ойи охиригача Олий Мажлис Қонунчилик палатасига кўриб чиқиш учун киритилиши режалаштирилмоқда. Бу ҳақда 10 сентябрь куни парламент қуйи палатаси йиғилишида Коррупцияга қарши кураш агентлиги директори Акмал Бурханов маълум қилди. «Газета.uz» бу мавзуга эътибор қаратди.
Депутат Умида Раҳмонованинг маълум қилишича, 2023 йилда коррупция жинояти учун судланган 566 нафар шахс давлат хизматига қайтадан ишга кирган ва коррупция жиноятларини қайта содир этган. У коррупционерлар реестри қачон ишга тушиши борасида савол қўйди.
Реестрни ишлаб чиқиш президентнинг 2021 йил 6 июлдаги қарорида белгиланган. Реестрга киритилган шахсларга қуйидагилар тақиқланади:
- давлат хизматига қабул қилиниши ва давлат мукофотлари билан тақдирланиши;
- сайланадиган ва алоҳида тартибда тайинланадиган лавозимларга номзодларининг кўрсатилиши;
- давлат органлари ҳузуридаги жамоатчилик кенгашлари ҳамда идоралараро коллегиал органларнинг аъзолигига киритилиши;
- уларнинг тадбиркорлиги давлат харидларида ва давлат-хусусий шериклик битимида иштирокчи (ижрочи) сифатида қатнашиши;
- давлат улуши 50 фоиздан юқори бўлган ташкилотлар ҳамда давлат таълим муассасаларида раҳбарлик лавозимларида фаолият юритиши.
Реестр тўғрисидаги қонун лойиҳасини уч ой муддатда киритиш топширилганди. Коррупцияга қарши кураш агентлиги раҳбари Акмал Бурхановнинг айтишича, агентлик ушбу ҳужжат ва реестрни яратиш устида иш олиб бормоқда. Унга кўра, қонун лойиҳаси 2022 йил бошида ишлаб чиқилган бўлиб, 2023 йилда бошқа вазирлик ва идоралар томонидан маъқулланган.
«Жорий йил бошида биз лойиҳани Президент администрациясига киритгандик, лекин администрация томонидан бир қатор эътирозлар [билдирилди] ва халқаро тажрибадан келиб чиққан ҳолда [ҳужжатни] янада такомиллаштириш бўйича вазифа юклатилди. Биз бу вазифалардан келиб чиқиб, қонун лойиҳасини янада такомиллаштирдик. Шу кунларда биз яна бир марта охирги версиясини Президент администрацияси орқали Қонунчилик палатасига киритишни режалаштирдик. Ўйлайманки, шу ой охирига қадар бу қонунни сизларнинг эътиборингизга кўриб чиқиш учун киритамиз», — деди у.
Эслатиб ўтамиз, президент фармони билан 2022 йил 1 январдан давлат хизматчилари, уларнинг турмуш ўртоқлари ва вояга этмаган фарзандларининг даромадлари ва мол-мулкини мажбурий декларациялаш жорий этилиши керак эди.
2021 йил 13 ноябрда қонун лойиҳаси Вазирлар Маҳкамасига киритилганди. Бироқ ҳукумат қонун лойиҳасини парламентга тақдим этмаган, дея қайд этганди Коррупцияга қарши кураш агентлиги.
2024 йилнинг май ойида агентлик раҳбари Акмал Бурханов «Газета.uz»га берган интервюсида қонун деярли тайёрлигини маълум қилганди.
«Давлат хизматчиларининг мол-мулки ва даромадларини декларация қилиш тўғрисидаги қонун» лойиҳасини ишлаб чиққанмиз. Манфаатдор вазирлик ва идоралар билан келишганмиз. Адлия вазирлигидан экспертизадан ҳам ўтказилган. Қонунимиз деярли тайёр, жамоатчилик муҳокамасига қўйилиши режалаштирилган. Шу билан бирга, биз қонун билан бир қаторда тизимни яратиш устида ҳам ишлаяпмиз", — деган у.
Унинг сўзларига кўра, Божхона қўмитаси ва Солиқ қўмитаси тажриба тариқасида ҳамма ходимларининг декларацияларини киритмоқда.
