Мадрид маъмурияти Lime, Dott ва Tier кикшеринг компанияларининг фаолият лицензиялари бекор қилинганини маълум қилди. Натижада Испания пойтахтида электр самокатларни ижарага бериш хизматлари қолмади, деб хабар бермоқда CNN.
«Бизнинг устувор вазифамиз — Мадрид аҳолисининг жисмоний яхлитлиги ва хавфсизлиги. Шаҳар кўчаларида электр самокатларни ижарага берувчи компанияларнинг рухсатномаларини бекор қиламиз. Улар биз пиёдалар, айниқса, қариялар хавфсизлигини таъминлаш учун қўйган шартларга риоя қилмади», — деб ёзди шаҳар мери Хосе Луис Мартинес-Алмейда.
Мадрид шаҳри кенгашининг таъкидлашича, учала кикшеринг компанияси 2023 йил май ойида берилган лицензиялар шартларини бузган. Кенгаш маълумотларига кўра, улар ўз фаолиятини текширишга тўсқинлик қилган, ҳокимиятга керакли маълумотларни тақдим этмаган ва уларнинг ўз интерфейсларига киришини таъминламаган.
Бундан ташқари, компаниялар барча самокатлар учун шаҳар бўйлаб хизмат кўрсатиш ва суғурта қопламасини таъминлай олмади, шунингдек, муайян ҳудудларда ҳаракатланиш ва тўхташни тақиқловчи технологияларни жорий этмади.
Авваллари компанияларнинг ҳар бири 2000 та электр самокатни ижарага бериш ҳуқуқига эга эди. Октябрь ойидан бошлаб уларнинг лицензиялари бекор қилинади. Хизматлар шаҳар кенгаши қарори устидан шикоят қилиш учун 20 кунга эга.
Аммо Мартинес-Алмейда Мадрид ҳукумати электр самокатлар ижараси учун қўшимча рухсатномалар бермаслиги ҳақида огоҳлантирди, чунки «бозор фуқаролар учун кенгаш томонидан белгиланган хавфсизликнинг энг юқори даражасини кафолатловчи талабларга жавоб бера олмаслиги аниқ бўлди».
Шаҳарда хусусий электр самокатлардан фойдаланишга ҳали ҳам рухсат бор, дея қўшимча қилди мерия.
- Мадрид Европада электр самокатларни ижарага бериш хизматларини тақиқлаган биринчи шаҳар эмас. Ўтган йилнинг сентябрида маҳаллий аҳоли шаҳар референдумида ёқлаб овоз берганидан сўнг Парижда электр самокатларни ижарага олиш тақиқланган эди.
