9 сентябрь куни Париждан қайтган Ўзбекистон Паралимпия терма жамоаси Тошкент аэропортида тантанали равишда кутиб олинди. «Газета.uz» фотомухбири Мурод Юсуф ушбу маросимдан фоторепортаж тайёрлади.
Тадбирда Ўзбекистон президенти администрациясининг ижтимоий ривожланиш департаменти раҳбари Одил Абдураҳмонов, бош вазир Абдулла Арипов, Қонунчилик палатаси спикери Нуриддинжон Исмоилов, Ижтимоий ҳимоя миллий агентлиги директори Мансурбек Оллоёров, Миллий паралимпия қўмитаси раиси Мухторхон Тошхўжаев, унинг биринчи ўринбосари Шаҳноза Мирзиёева, Осиё Олимпия кенгашининг Марказий Осиё минтақаси бўйича вице-президенти Отабек Умаров, Тошкент шаҳри ҳокими Шавкат Умурзоқов ва Ўзбекистон халқ шоири Маҳмуд Тоир иштирок этди. Шунингдек, жамоатчилик вакиллари, спортчиларнинг яқинлари ва журналистлар ҳам қатнашди.
Маросимда Паралимпия ўйинларида Ўзбекистон делегацияси байроқдорларидан бири Хусниддин Норбеков байроқни Абдулла Ариповга топширди. Ҳукумат раҳбари эса уни Миллий паралимпия қўмитаси раиси Мухторхон Тошхўжаевга берди.
Шундан сўнг спортчилар ва уларнинг оила аъзолари аэропортдан Миллий Паралимпия қўмитасига махсус йўналиш — Бобур, Нукус, Ойбек, Шароф Рашидов, Шаҳрисабз, Навоий кўчалари бўйлаб автобусларда йўл олди. Қўмитада Сенат раиси Танзила Нарбаева ва спикер Нуриддинжон Исмоилов иштирокида Паралимпиада совриндорларига мукофотлар топширилди. Кеча уларнинг қандай мукофотлар олгани ҳақида ёзгандик.
Эслатиб ўтамиз, бу галги Паралимпиада ҳам худди Олимпиада сингари Ўзбекистон учун тарихдаги энг муваффақиятлиси бўлди — республика 168 давлат орасида 13-ўринни эгаллади. Ўзбекистонлик спортчилар 26 та медални қўлга киритди, шундан 10 таси олтин, 9 таси кумуш ва 7 таси бронза.
Фото
Ҳусниддин Ато олган суратлар
