Ўзбекистонда сўнгги кунларда тадбиркорлар қуёш панеллари ўрнатишга мажбурланаётгани ҳақидаги хабарлар юзасидан Ўзбекистон Либерал-демократик партияси депутатлик сўровлари юбормоқчи.
Партия матбуот хизмати хабарида айтилишича, ҳеч ким тадбиркорни унинг истагига зид ҳолда бирор нарсага мажбурлаши мумкин эмас. «Бундай ҳатти-ҳаракатлар тадбиркорларнинг ҳуқуқ ва эркинликларини кафолатлаш йўлида давлатимизда қабул қилинган қонунчиликка зид», — таъкидлади ЎзЛиДеП.
Партия, шунингдек, Парламент сайловига тайёрлаган дастурига шу каби ҳолатларнинг олдини олиш учун давлат органлари мансабдор шахсларининг тадбиркорлик фаолиятига аралашувини қатъий тақиқлаш чораларини кўриш ҳам киритилганини эслатди.
«Ушбу ишлар мажбурлаш йўли билан эмас, балки қайта тикланувчи энергия манбаларидан фойдаланишнинг устунликлари, афзал жиҳатларини тушунтириш, тарғиб қилиш, тегишли молиявий имкониятлар яратиш орқали амалга оширилиши лозим деб биламиз», — дейилади хабарда.
Ҳозирда партиянинг марказий ва худудий кенгашлари томонидан ўрганишлар бошланган. Агар тармоқларда тарқалган маълумот ўз тасдиғини топса, хабарга кўра, ЎзЛиДеП ўз депутатлари орқали тегишли вазирлик ва идораларга депутатлик сўровлари билан мурожаат қилади ва бундай ҳаракатларга ҳуқуқий баҳо беришни талаб қилади.
Аввалроқ молиячи Отабек Бакиров тадбиркорларни қуёш панеллари ўрнатишга мажбурлашнинг асосий усули электрдан узиш, кундузги иш вақти давомида ўчириб қўйиш, шартнома бўйича лимитни камайтириш билан қўрқитиш бўлиб қолаётганини айтганди.
«Энг кулгулиси, айрим туманларда тадбиркорлардан қуёш панелларини ўрнатиш орқали генерацияни ошириш эмас, шунчаки панелларни сотиб олиш талаб қилинмоқда. Яъни энергозўравонларнинг мақсади ҳеч қандай энергосамарадорлик эмас, балки қайсидир муттаҳам корчалоннинг навбатдаги партиядаги қуёш панелларини қимматлаштириб ўтказишга айланиб кетган», — деб таъкидлаганди у.
Молиячи савол қўйди: «Панелларни ўрнатиш ёки ўрнатмасликни балки бозорнинг ўзига ва тадбиркорларнинг ихтиёрига қўйиб берармиз?»
Энергетика вазирлигининг масалага муносабат билдиришича, кимнидир қуёш панели ўрнатишга мажбурлаш, ўрнатилмаган тақдирда тармоқдан узиб қўйиш билан огоҳлантириш «ҳеч бир қонунчилик ҳужжатларида белгиланмаган».
«Демакки, бундай қилиш қонунчиликка зид ва Энергетика вазирлиги бу каби хатти-ҳаракатларни мутлақо ёқламайди», — ёзди вазирлик матбуот хизмати.
Энерговазирликнинг қўшимча қилишича, 2023 йилнинг 1 октябридан юридик шахслар ва тадбиркорлар учун, 2024 йилнинг 1 май санасидан эътиборан эса аҳоли истеъмолчилари учун энергоресурслар тариф нархларининг табақалаштирилган равишда оширилиши истеъмолчиларда қуёш панели ҳамда гелиоколлекторларга нисбатан қизиқишни табиий равишда кучайтирган.
Хусусан, жорий йилнинг 1 августигача «Қуёшли хонадон» дастури бўйича жами 44 516,4 кВт қувватга тенг 13 минг 324 та, юридик истеъмолчилар билан эса жами 197 201 кВт қувватга тенг 8 минг 776 та шартнома имзоланган. Бу фуқароларнинг барчаси қуёш панелини ўз хоҳиши билан ўрнатган, таъкидланади хабарда.
