Россияда меҳнат муҳожирларига ўз оилаларини мамлакатга олиб келишни тақиқловчи қонун лойиҳаси тайёрланмоқда. Бу ҳақда Давлат думаси раиси Вячеслав Володин «Россия 24» телеканалига берган интервьюсида маълум қилди.
«Бирор киши ишлаш учун келаркан, ўз оила аъзоларини бирга олиб келиши мумкин эмас. Биз ҳозирда бундай ёндашувни федерал қонун даражасида амалга оширишга ҳаракат қилмоқдамиз», — деди Володин.
Унинг сўзларига кўра, Давлат думаси депутатларининг аксарияти, қайси фракцияга мансублигидан қатъи назар, ушбу ташаббусни «аниқ қўллаб-қувватлайди».
Володин, шунингдек, фуқароликни олиш учун сохта никоҳларнинг олдини олишга қаратилган қонун лойиҳаси биринчи ўқишда муҳокама қилинганини маълум қилди. Бундай ҳолда никоҳда бўлиш муддати бир йилдан икки йилгача узайтирилиши мумкин.
Володин 4 сентябрь куни Самарадаги Давлат думаси кенгашининг сайёр йиғилишида меҳнат муҳожирлари оилаларининг Россияга кўчишига қарши чиқди. «Биз ишга келадиган қуйи малакали меҳнат муҳожирлари ҳақида гапирганда, улар ишлаш учун келиши ва бундан ортиқ ҳнч нима бўлмаслиги учун қарор қабул қилишимиз керак», — деди у.
Сиёсатчининг таъкидлашича, ишчининг кундалик ҳаётини уни ёллаган корхона белгилаши керак, «қариндошлар ва оилаларга келсак, улар ишчи келган мамлакатда кутиб туришлари лозим». «Бу ерга ҳаммани кўчириб келиш шарт эмас», — деди Володин. У, шунингдек, Россияга бошқа давлатдан ишлашга келган шахс рус тилини билиши, маҳаллий урф-одатларга ҳурмат кўрсатиши ва қонунларга риоя қилиши муҳимлигини қўшимча қилди.
Меҳнат мигрантларига ўз оилаларини олиб келишни тақиқлаш ташаббуси билан аввалроқ ЛДПР партияси чиққанди. Август ойида партия томонидан ишлаб чиқилган қонун лойиҳаси Россия Федерациясида вақтинча ишлаётган шахснинг қариндоши эканига асосланиб, хорижликларнинг Россияга киришини тақиқлашни таклиф қилган. Ҳужжатда айтилишича, гап мамлакатда фақат меҳнат шартномаси ёки патент асосида бўлган қуйи малакали мутахассислар ҳақида кетмоқда.
«Меҳнат мигрантларининг оилалари уларни ўз ватанида кутиши керак. Россияга келган иш билан таъминланган хорижликларнинг яқинлари ихчам анклавларда яшайди, ўз тилларида гаплашади, маҳаллий аҳолига менсимай муносабатда бўлади. Кўпинча бундай муҳожирларнинг квартиралари уй-жой коммунал хўжалиги учун пул тўламайди… Бу муаммоларнинг барчасини бартараф этиш ва малакасиз хорижликларга ишга жойлашиш даврида оиласини олиб келишини тақиқлаш керак. Келди, ишлади — уйга. Бошқа гап бўлиши мумкин эмас», — деган ўшанда партия раҳбари Леонид Слуцкий.
Россия Хавфсизлик кенгаши раиси ўринбосари Дмитрий Медведев ҳам мигрантларга ўз оилаларини мамлакатга олиб келишни тақиқлашга чақирди. «Агар одам мавсумий иш учун келса, нега у ўз оиласини ўзи билан олиб келади?» — деди Медведев. Шунингдек, у Россия мактабларида ўқиётган муҳожирларнинг фарзандларини рус тилини ўрганишга мажбурлашни таклиф қилди.
- РБК нашрининг таъкидлашича, Россия ҳукумати «Крокус Сити Ҳолл»даги теракт оқибатида 140 дан ортиқ киши ҳалок бўлган, 500 дан ортиқ киши жароҳатланганидан кейин муҳожирларга нисбатан риторикани кучайтиришни бошлаган. Теракт учун масъулиятни ИШИД-Хуросон ўз зиммасига олган. Иш бўйича Марказий Осиё мамлакатларидан келганлар гумон қилинувчилар ҳисобланади.
