3−12 сентябрь кунлари Тошкентда Ўзбекистон креатив ёшларининг RE/Generation биринчи арт-фестивали ўтказилди. Ислом Каримов номидаги республика хайрия жамоатчилик фонди ва Sen Yolg‘iz Emassan жамғармаси томонидан ташкил этилган кўргазмадан «Газета.uz» фотомухбири Мурод Юсуф фоторепортаж тайёрлади.
Каримов фондининг маълум қилишича, кўргазма 6000 квадрат метрдан зиёд майдонни эгаллаган Axelon картинг клубида ташкил этилди. Унда 300 дан ортиқ тасвирий полотно, 50 та графика дурдонаси, 200 та фото санъати намуналари, ўнлаб инсталляция, перформанслар ва Digital art усулидаги лойиҳалар намойиш қилинди.
Таъкидланишича, RE/Generation — ўзбекистонлик иқтидорли ижодкорларнинг янги авлодини танитишга қаратилган санъат йўналишидаги йирик воқеа. Кўргазма турли санъат йўналиши вакилларини бирлаштирган: рассомлар, фотографлар, шоирлар, мусиқачи ва ҳунармандлар бир даврада жамланган.
«Буларнинг бари ташриф буюрувчиларга таассуротларнинг ранг-баранг палитрасини туҳфа этиши аниқ. Фестиваль доирасида бутун Ўзбекистон бўйлаб 60 дан зиёд креатив ёшларнинг ишлари кўргазмага қўйилди. Шунингдек, санъатшунослар ва ташкилотчиларнинг маъруза ҳамда илмий баҳслари, таниқли рассомларнинг маҳорат дарслари, мусиқий жамоаларнинг чиқишлари уюштирилди», — дейилади фонд ахборотида.
Кўргазманинг очилиш маросимида Sen Yolg‘iz Emassan жамғармаси васийлик кенгаши раиси Лола Тилляева иштирок этиб, нутқ сўзлади.
«Азалдан бу замин минг йиллар мобайнида навбатма-навбат тараққиёт чўққиларини эгаллаган тамаддунлар маркази бўлиб келган. Кўзни қувнатувчи хонатласдан тикилган кўйлаклар, бетакрор дўппилар — буларнинг бари биз кўз қорачиғидек асраб-авайлаётган ва авлоддан авлодга омонат ўлароқ ўтказаётган бой тарихий меросимиз намуналаридир. Замонавий санъатнинг қанчалик муҳимлиги ҳақида сўз борар экан, ўз даврининг буюк рассомлари Ван Гог ёки Рембрандтни ёдга олиш мумкин. Улар ҳам ўша даврда замонавий санъатни тамсил этган эди. Дарҳақиқат, айнан замонавий санъат жамиятимизнинг кўзгуси саналади. Зеро, биз ҳам унда акс этамиз», — деди у.
Фото: Каримов фонди
Кўргазма куратори, таниқли рассом Бобур Исмоиловнинг айтишича, ушбу лойиҳа Ўзбекистонда тасвирий санъат равнақига кучли туртки беради.
«Кўргазманинг номиёқ унинг теран ғоясини ифодалайди: қайта туғилиш, янгиланиш, дунёни янгидан идрок этиш. Бу — мамлакатда санъатнинг қайта туғилиши ва янгиланишидек улуғвор, эзгу ниятларнинг амалдаги ифодаси. RE/Generation Нукусдан Фарғона водийсига қадар, Самарқанддан Бухорою Тошкентга қадар — Ўзбекистоннинг турли бурчакларида ижод қилиб келаётган ёш иқтидор эгалари бошини қовуштираётган илк кўргазмадир», — дея таъкидлади у.
Фото
