Футзал бўйича ФИФА-2024 жаҳон чемпионати бўлиб ўтиши муносабати билан Тошкент шаҳрида жойлашган Humo Arena ёнидаги кўчаларда транспорт ҳаракати вақти-вақти билан чекланади, дея хабар бермоқда пойтахт ЙҲХБ.
Қайд этилишича, кўчалар спорт мажмуасига ташриф буюрувчи меҳмонлар ва мухлисларнинг хавфсизлигини таъминлаш ҳамда жамоат тартибини сақлаш мақсадида вақтинча ёпилади.
14 сентябрдан 6 октябргача вақти-вақти билан қуйидаги кўчаларда транспорт воситаларининг ҳаракати қисман чекланади:
- Фурқат — Бешёғоч кўчасидан Бешёғоч кўчаси бўйлаб, Бешёғоч — Афросиёб кўчалари кесишган чорраҳасигача;
- Бешёғоч — Афросиёб кўчалари кесишган чорраҳасидан, Афросиёб кўчаси бўйлаб Ислом Каримов — Афросиёб кўчалари кесишган чорраҳасигача.
Эслатиб ўтамиз, Марказий Осиёда илк бор ўтадиган ФИФА шафелигидаги мусобақада дунёнинг энг кучли 24 терма жамоаси футзал бўйича жаҳон чемпионлиги учун кураш олиб боради. Тарихда 10-бор ташкил этилаётган ўйин 14 сентябрдан 6 октябргача давом этади.
Беллашувларга Ўзбекистоннинг уч шаҳри — Тошкент, Бухоро ва Андижон мезбонлик қилади. Регистон майдонида футзал бўйича Жаҳон чемпионати-2024 турнири гуруҳ босқичига ташланган қуръага кўра, Ўзбекистон «А» гуруҳидан жой олган, жамоага Нидерландия, Парагвай ва Коста-Рика рақиблик қилади.
Ўзбекистон жамоасининг иштироки 14 сентябь куни соат 20:00 да Нидерландияга қарши баҳс билан бошланади. 17 сентябрь соат 20:00 да Парагвайга қарши майдонга тушса, 20 сентябрь соат 20:00 да Коста-Рика жамоаси билан ўйнайди.
Аввалроқ, чемпионатга чиптаси бор мухлислар темирйўлдан 50 фоизли чегирма билан фойдаланиши хабар қилинганди. Шунингдек, улар учун жамоат транспортидан бепул фойдаланиш имконияти яратилади. Чипталарни онлайн харид қилиш ва кириш жойида текширтириш учун futsal2024.uz сайти яратилган.
