АҚШ президентлигига республикачилардан номзод Дональд Трамп 12 сентябрь, пайшанба куни, Аризона штатида бўлиб ўтган сайловолди кампаниясида Камала Ҳаррисга қарши дебатлардан сўнг ўзининг биринчи оммавий нутқини сўзлади.
У демократлардан рақиби, амалдаги вице-президент Камала Ҳаррис билан бошқа дебат ўтказмасликка қарор қилгани ҳақида ҳам гапирди (бу ўзининг Truth Social тармоғида алоҳида эълон қилинди).
«Боксчи жангда ютқазса, унинг оғзидан чиқадиган биринчи сўз „Реванш хоҳлайман“ бўлади. Сўровларга қаралса, дебатда мен демократларнинг радикал сўл номзоди ўртоқ Камала Ҳарриснинг устидан ғолиб чиқдим ва у дарҳол янги дебатни талаб қилди», — деб ёзди у.
Сиёсатчи Ҳаррис ва АҚШ президенти Жо Байденни «мамлакатни вайрон қилишда» айблади.
«Миллионлаб жиноятчилар ва ақлдан озганлар АҚШга тўпланди, улар умуман назорат қилинмади ва текширилмади, инфляция бизнинг ўрта синфимизни банкрот қилди», деган Трамп «Камала ва Жо келтириб чиқарган муаммолар» улар билан дебатларда батафсил муҳокама қилинганини таъкидлади.
Трампнинг айтишича, Ҳаррис «Fox дебатларига бормаган, NBC ва CBS телеканалида чиқиш қилишдан бош тортган». Вице-президент «ўтган қарийб тўрт йил ичида қилиши керак бўлган ишларга эътибор қаратиши керак», деган Трамп «Учинчи дебат бўлмайди!» — дея таъкидлади.
- Июнь ойида Дональд Трамп АҚШнинг амалдаги президенти Жо Байденга қарши дебат ўтказганди. Ўшанда Байден муваффақиятсизликка учради ва президентлик пойгасидан чиқди. Унинг ўрнига АҚШ Демократик партиясидан вице-президент Камала Ҳаррис номзод бўлди.
- Ҳаррис ва Трамп ўртасидаги дебат 10 сентябрь куни бўлиб ўтди. CNN сўрови иштирокчилари (63% респондент Ҳаррис Трампдан яхшироқ сўзлаганини таъкидлади) ва таҳлилчилар, шу жумладан, республикачиларга хайрихоҳ бўлганлар демократлар номзодини ғолиб деб топди.
