Шавкат Мирзиёев Қозоғистон президенти Қосим-Жомарт Тоқаевнинг таклифига биноан 17 сентябрь куни амалий ташриф билан Остона шаҳрида бўлади, дея хабар бермоқда давлат раҳбарининг матбуот хизмати.
Қайд этилишича, президент у ерда Марказий Осиё мамлакатлари ва Германия етакчиларининг иккинчи учрашувида иштирок этади. Саммитда минтақа мамлакатларининг Германия билан кўп қиррали ҳамкорлигини янада ривожлантириш ва чуқурлаштириш масалалари муҳокама қилинади.
Савдо-иқтисодиёт, инвестиция, технологиялар, транспорт-коммуникация ва бошқа устувор йўналишларда амалий ҳамкорликни кенгайтиришга алоҳида эътибор қаратилади. Шунингдек, Германиянинг етакчи компания ва банклари раҳбарлари билан қўшма учрашув ўтказиш режалаштирилган.
«Марказий Осиё — Германия» форматидаги биринчи саммит ўтган йилнинг 29 сентябрь куни Берлин шаҳрида ўтказилган эди.
