17−20 сентябрь кунлари Тошкентдаги CAEx кўргазмалар мажмуасида ICTWEEK Uzbekistan 2024 ахборот-коммуникация технологияларининг навбатдаги ҳафталиги бўлиб ўтади.
20 йил давомида (2004 йилдан бери) ўтказиб келинаётган мазкур тадбир тажриба алмашиш, соҳадаги сўнгги ютуқларни намойиш этиш, мавжуд муаммолар ва уларни ҳал этиш йўлларини муҳокама қилиш майдони бўлиб хизмат қилмоқда.
Ўзбекистон рақамли технологиялар вазири ўринбосари Рустам Каримжоновнинг душанба куни бўлиб ўтган матбуот анжуманида таъкидлашича, тадбирда иштирок этиш учун 1000 дан ортиқ хорижий меҳмонлар рўйхатдан ўтган, бу ўтган йилга нисбатан 3 баробар кўп.
Ҳафталикнинг очилиш маросимида РТВ ва бошқа вазирликлар раҳбарлари, хорижий ташкилотлар вакиллари, шунингдек, тадбир ҳамкорлари — Invest Qatar, DataWolt, Dell, Uzum, ZTE, Huawei ва IT Park компаниялари иштирок этади.
Иштирокчилар орасида «қиймати 100 миллион доллардан 1 миллиард АҚШ долларигача бўлган компаниялар эгалари ва вакиллари ҳам бўлади», деди вазир ўринбосари.
Ҳафталикнинг асосий тадбирларидан бири — ICT Expo кўргазмаси ўтган йилгидан икки баравар кўп — 10 минг квадрат метр майдонни эгаллайди. Иштирокчилар сони ҳам 2,5 баравар кўпайди — 250 тагача, чет эллик иштирокчилар ҳам 2,5 баробар кўпроқ бўлади.
Кўргазмадан Япония, Жанубий Корея, Хитой, Қатар, Латвия каби мамлакатларнинг етакчи IT компаниялари иштирокидаги миллий павильонлар ҳам ўрин олган.
«Бу йил кўргазма фақат иштирокчиларнинг ўзи, шунингдек, хорижий ва маҳаллий инвесторлар ҳисобидан ўтказилмоқда. Давлат бюджети ёки Рақамли технологиялар вазирлигига қарашли ташкилотлар маблағлари жалб этилмаган», — деди Рустам Каримжонов.
«Меҳмонларга қулайлик яратиш мақсадида 17−20 сентябрь кунлари шаҳарнинг турли нуқталаридан CАEх мажмуасига бепул автобуслар қатнови йўлга қўйилади», — деди депутат Рустам Каримжонов.
Улар 9:00 дан 18:00 гача ҳар соатда IT Park Узбекистан (Иброҳим Мўминов кўчаси, 4), «Ўзбекистон» меҳмонхонаси, «Дўстлик» ва «Буюк Ипак йўли» (Муҳаммад Юсуф кўчаси, собиқ Доғистон) метро бекатларидан, шунингдек, Шимолий вокзалдан жўнайди.
АКТ ҳафталигининг айрим тадбирлари (дастур)
«Shared Services & Offshore Outsourcing» конференцияси — унда Ўзбекистондаги хорижий компаниялар учун имкониятлар ва шарт-шароитлар, имтиёзлар, кўп тилли ишчи кучи, бизнесни қўллаб-қувватлаш дастурлари тақдим этилади.
«IT соҳасида аёллар: имкониятлар ва муаммолар» конференцияси — тадбирдан мақсад IT соҳасида муваффақиятли карьерага интилаётган аёлларни илҳомлантириш ва қўллаб-қувватлаш, тўсиқларни енгиб ўтиш ва юқори натижаларга эришиш стратегияларини муҳокама қилишдан иборат. Конференция доирасида «IT Ladies Uzbekistan» журналининг тақдимоти бўлиб ўтади, деди рақамли технологиялар вазири маслаҳатчиси Камола Собирова. Бу соҳа мутахассислари учун ҳам, АКТ соҳасига кирмоқчи бўлган аёллар ва қизлар учун ҳам қизиқарли бўлиши кутилмоқда.
«She Loves Tech» танлови.
«Startup & Venture» саммити венчур капитални молиялаштириш, аутсорсинг ва сунъий интеллект бўйича форумлар, инвесторлар билан учрашувлар, стартапларни тақдим этиш ва етакчи экспертлар тажрибаси билан танишиш имкониятларини ўз ичига олади.
«Startup pitch» танлови.
«Рақамли ҳукумат: истиқболли режалар ва тўсиқлар» конференцияси.
Ўзбекистон-Латвия форуми — мавзулар АКТ сиёсати ва рақамли ҳукумат, рақамли кўникмалар ва таълим, сунъий интеллект ва бошқаларни ўз ичига олади.
Корея-Ўзбекистон IT бизнес форуми — икки мамлакат IT компанияларининг тақдимотлари, B2B учрашувлари ва нетворкингни ўз ичига олади.
Сунъий интеллект форуми.
«IT таълими ва фрилансинг» форуми.
GameDev куни.
