Флорида штатида Республикачилар партиясидан АҚШ президентлигига номзод Дональд Трамп гольф ўйнаётган клуб яқинида отишма содир бўлди. CNN нашрининг хабар беришича, Федерал қидирув бюроси собиқ президентга нисбатан бўлган эҳтимолий суиқасдга уринишни текширишни бошлади.
Телеканал маълумотларига кўра, Махфий хизмат агентлари гольф клуби ҳудудидаги буталар орасида милтиқ стволини кўриб, ўша тарафга қарата ўқ узган. Эркак Трампдан 300 метрдан 500 метргача узоқликда бўлган.
Эркак қуролини ташлаб, машинада қочиб кетган, сўнг уни қўшни округда қўлга олишган. Буталар орасидан оптик мўлжаллагичли АК-47 русумидаги автомат қурол, иккита рюкзак ва GoPro видеокамераси топилди.
Ҳибсга олинган 58 ёшли Райан Уэсли Рут Гавайи оролларида кичик қурилиш компанияси эгасидир, деб ёзади CNN. 2016 йилда у Трампга овоз берган, аммо кейин, унинг ижтимоий тармоқлардаги ёзувларига қараганда, собиқ президентдан ҳафсаласи пир бўлган ва вақти-вақти билан ўз постларида республикачини танқид қилган. Шунингдек, у Украинани Россия билан урушда қўллаб-қувватлашини бир неча бор билдирган. Хусусан, Рут «Кремлни буткул кул қилиш» кераклигини ёзган ва Украина томонида жангларда иштирок этишга тайёрлигини билдирган.
Трамп ўз тарафдорларига электрон почта орқали «хавфсиз ва ҳаммаси жойида эканини» ёзган. «Мени ҳеч нарса тўхтата олмайди. Мен ҳеч қачон таслим бўлмайман», — деди республикачи.
Демократик партиядан президентликка номзод Камала Ҳаррис Трампнинг гольф клубидаги отишмадан хабардорлигини маълум қилди. «Хавфсиз эканидан хурсандман. Америкада зўравонликка ўрин йўқ», — деб ёзди у Х саҳифасида.
АҚШнинг амалдаги президенти Жо Байден иш учун Махфий хизматга миннатдорлик билдириб, «собиқ президент жабрланмагани учун енгил тортганини» таъкидлади. Унинг қўшимча қилишича, АҚШда «сиёсий ва бошқа турдаги зўравонликка ўрин йўқ».
Бу сўнгги икки ой ичида Дональд Трампга нисбатан қилинган иккинчи суиқасддир. Июль ойида у Пенсильвания штатидаги сайловолди митингида отишма пайтида қулоғидан яраланган. Махфий хизмат агентлари босқинчини отиб ташлаган.
