2,5 йил давом этган кенг масштабли уруш давомида Россия ва Украина томондан ҳалок бўлган ва яраланган ҳарбий хизматчилар сони миллион кишига етди, деб ёзмоқда The Wall Street Journal (WSJ) Украина манбалари ва Ғарб разведка маълумотларига таяниб.

Нашрнинг таъкидлашича, аниқ йўқотишларни ҳисоблаш мушкул, чунки на Россия, на Украина расмий маълумотларни эълон қилади ёки «кўпчилик ишонмайдиган рақамларни» келтиради.

Украинанинг йил бошидаги махфий ҳисоб-китобларига кўра, Украина Қуролли кучларининг ҳалок бўлган ҳарбий хизматчилари сони 80 мингни, ярадорлар сони эса 400 минг кишини ташкил қилган.

Ғарб разведкасининг Россия йўқотишлари ҳақидаги ҳисоб-китоблари турлича: баъзи манбаларга кўра, қурбонлар қарийб 200 мингга, ярадорлар сони эса 400 мингга яқин.

WSJ катта йўқотишлар Россия учун муаммо туғдираётганини ёзаркан, бу аҳолиси ундан анча кам бўлган Украина учун «сезиларли даражада ҳалокатли» эканини қайд этди.

Ҳисоботда айтилишича, юқори ва тез ортиб бораётган қурбонлар сони урушдан олдин аҳоли сонининг қисқариши билан курашаётган иккала давлат учун ҳам узоқ муддатли оқибатларга олиб келади.

Бундан ташқари, уруш аҳолининг кўчишига ҳам олиб келди. WSJ маълумотларига кўра, 2022 йил февраль ойида босқин бошланганидан бери 600 мингга яқин одам Россиядан кетган. БМТ маълумотларига кўра, 6 миллиондан ортиқ одам эса Украинани тарк этган.