Ливаннинг «Ҳизбуллоҳ» қуролли гуруҳи аъзоларида бир вақтнинг ўзида пейжерлар (овозли хабарларни қабул қилувчи симсиз телекоммуникация қурилмаси) портлаганда камида тўққиз киши ҳалок бўлди ва 3000 га яқин киши яраланди. Reuters маълумотларига кўра, дастлабки портлашлар 17 сентябрь куни маҳаллий вақт билан тахминан 15:30 да содир бўлган ва Ливаннинг турли ҳудудларида, жумладан, мамлакат жанубида ва пойтахт Байрутда бир соат давом этган.
Агентлик хавфсизлик хизматидаги манбаларга ва воқеа жойидан олинган видеоёзувлар таҳлилига таяниб, баъзи пейжерлар овоз сигнали берилгандан сўнг портлаганини, шунинг учун қурилма эгалари уларни қўлга олган ёки экранни текшириш учун юзларига олиб келганини таъкидлади.
Reuters таҳлилларига кўра, портлашлар нисбатан кучсиз бўлиб, фақат қурилма эгасини ёки унга энг яқин турган шахсни жароҳатлаган.
Reuters`нинг Ливан хавфсизлик кучларидаги юқори мартабали манбаси ва яна бир манбанинг таъкидлашича, Исроил разведкаси «Моссад» портлашлардан бир неча ой олдин «Ҳизбуллоҳ» томонидан буюртма қилинган 5000 та пейжерга портловчи модда қўйган. Агентлик суҳбатдошларидан бирининг таъкидлашича, гуруҳ Тайваннинг Gold Apollo компаниясидан пейжерларга буюртма берган ва қурилмалар йил бошида Ливанга олиб келинган. Компаниян ўз баёнотида ушбу қурилмаларни ишлаб чиқармаганини ва улар Тайван ишлаб чиқарувчисининг брендидан фойдаланиш ҳуқуқига эга бўлган Европадаги фирма томонидан ишлаб чиқарилганини таъкидлади.
Таъкидланишича, «Ҳизбуллоҳ» аъзолари Исроил уларнинг жойлашувини кузата олмаслиги учун уяли телефонлардан воз кечиб, пейжерларга ўтган. Портлаган қурилмалар гуруҳ томонидан сўнгги ойларда олиб келинган сўнгги модель бўлган, деб хабар берди агентлик манбалари.
«Ҳизбуллоҳ» содир бўлган воқеа учун жавобгарликни Исроилга расман юклади ва «адолатли жавоб» беришни ваъда қилди. Исроил ҳозирча пейжерларнинг портлаши ҳақидаги хабарларга изоҳ бермади.
Axios нашрининг манбаларга таяниб ёзишича, операция ҳафта бошида Исроил бош вазири Биньямин Нетаньяҳу, унинг вазирлар маҳкамаси аъзолари ва махсус хизматлар раҳбарлари иштирокидаги хавфсизлик бўйича йиғилишларда маъқулланган.
Операциядан хабардор бўлган исроиллик манбанинг айтишича, Исроил разведка хизматлари миналаштирилган пейжерлардан гуруҳни кучсизлантириш учун «Ҳизбуллоҳ»га қарши кенг кўламли урушда биринчи зарба сифатида фойдаланишни режалаштирган.
