21 сентябрь куни Андижон ва Тошкентда футзал бўйича 2024 йилги жаҳон чемпионати гуруҳ босқичи 3-туридан ўрин олган навбатдаги учрашувлар бўлиб ўтди ва уларнинг барида йирик ҳисоблар қайд этилди. Эслатиб ўтамиз, бир кун аввал Ўзбекистон терма жамоаси Коста-Рикага мағлуб бўлиб, мусобақадаги юришини тўхтатган эди.

Жумладан, дастлабки икки тур учрашувларини Андижонда ўтказган Қозоғистон терма жамоаси гуруҳдаги сўнгги ўйинда Тошкентда Янги Зеландияга қарши майдонга чиқди. Ўйин қозоқларнинг 10:0 ҳисобидаги ғалабаси билан тугади.

Голларнинг ярми Арнольд Кнауб ҳисобига ёзилди. ФИФАнинг қайд этишича, футзал бўйича жаҳон чемпионатларидаги охирги флешлар 2016 йили Колумбияда бўлган мундиалда бўлган. Қизиғи, 8 йил ҳеч ким такрорлай олмаган кўрсаткич, Кнаубнинг бешголидан бир ярим соат ўтар-ўтмас, Андижонда қайд этилди.

"Газета.uz"да реклама

21 сентябрь, шанба
«Д» гуруҳи, 3-тур учрашувлари
Қозоғистон — Янги Зеландия 10:0
Голлар: Ринат Турегазин (9), Акжўл Дарибай (12), Арнольд Кнауб (15, 16, 21, 23, 37), Лео (21, 30), Логан Висневски (31, автогол).
Учрашувнинг энг яхши ўйинчиси: Арнольд Кнауб (Қозоғистон).

Мигель Мельядо хет-трик қайд этиб, учрашувнинг энг яхши ўйинчисига айланган баҳсда Испания Ливия дарвозасига 8 та жавобсиз гол урди. ФИФАнинг ёзишича, бу испанларнинг сўнгги 20 йилда жаҳон чемпионатларида эришган энг йирик ғалабасидир.

Фото: ФИФАФото: ФИФА

Ливия — Испания 0:8
Голлар: Мигель Мельядо (9, 16, 28), Адольфо Фернандес (10), Франсиско Кортес (15, 29), Катела (19), Хесус Гордильо (32).
Учрашувнинг энг яхши ўйинчиси: Мигель Мельядо (Испания).

футзал бўйича жаҳон чемпионати 2024

Украина мундиални Аргентинага қарши оғир ўйин (1:7 ҳисобидаги мағлубият) билан бошлаган бўлса-да, охир-оқибат нимчорак финалчилар қаторидан ўрин ола билди ва энди 24 сентябрь куни Нидерландияга қарши, ФИФАнинг қайд этишича, фаворит мақомида майдонга чиқади.

Фото: ФИФАФото: ФИФА

Афғонистонликлар бироз эҳтиёткорроқ ўйин кўрсатганида, эҳтимол, 3-ўрин билан бўлса-да, бугуноқ плей-офф йўлланмасини ҳал қилиб улгурган бўларди, аммо уларнинг гол уришга бўлган иштиёқ Украинанинг қарши ҳужумларини ўтказиб юбориш билан тугади. Афғонларнинг бу юришидан ютган фақат Хорватия бўлди — кечадан бери тақдири нима бўлишини кутиб ётган «Б» гуруҳи вакили, мана, 3-ўрин билан нимчорак финалга чиқди.

«С» гуруҳи, 3-тур учрашувлари
Украина — Афғонистон 4:1
Голлар: Евҳений Жук (15), Данил Абакшин (16), Михайло Зварич (37), Иҳор Корсун (38) — Меҳран Ғуломий (26).
Учрашувнинг энг яхши ўйинчиси: Данил Абакшин (Украина).

Юқорида тилга олинган Арнольд Кнаубнинг бир ўйинда беш гол уриш борасидаги тарихий кўрсаткичи айнан Ангола — Аргентина ўйинида такрорланди. Аргентиналик Алан Бранди ўйин давомида Африка вакили дарвозасига бешта гол урди. У яна икки гол урса, умуман жаҳон чемпионтлари тарихидаги энг сермаҳсул 10 футзалчи қаторига киради.

Бу ўйинда бошқа бир қизиқ ҳолат ҳам кузатилди: аргентиналик Анхел Клаудино икки дақиқа ичида ҳам Ангола дарвозасига, ҳам ўз дарвозасига гол урди.

Ангола — Аргентина 5:9
Голлар: Жо (1, 2, 10), Анхел Клаудино (32, автогол), Адерито (33) — Алан Бранди (7, 17, 34, 34, 35), Кристиан Борруто (13), Кевин Арьета (18), Лукас Триподи (31), Анхел Клаудино (33).
Учрашувнинг энг яхши ўйинчиси: Алан Бранди (Аргентина).

футзал бўйича жаҳон чемпионати 2024

Навбатдаги учрашувлар

22 сентябрь, якшанба
«Е» гуруҳи, 3-тур учрашувлари
17:30. Тошкент.
Марокаш — Португалия
17:30. Бухоро
Панама — Тожикистон

«Ф» гуруҳи, 3-тур учрашувлари
20:00. Бухоро
Франция — Эрон
20:00. Тошкент
Венесуэла — Гватемала