Сенатнинг 57-ялпи мажлисида Ўзбекистон Олий суди раисининг ўринбосарлари сайланди. Бу ҳақда юқори палата матбуот хизмати хабар қилди.
Унга кўра, Ўзбекистон президентининг тақдимномаси ва Олий Мажлис Сенатининг тегишли қарорига асосан Икрам Тухтамуратович Муслимов беш йил муддатга Олий суд раисининг биринчи ўринбосари — судлов ҳайъати раиси лавозимига сайланди.
Илгари у Олий суд раисининг ўринбосари — жиноят ишлари бўйича судлов ҳайъати раиси лавозимида ишлаб келган. Робахон Маҳмудова лавозимидан озод этилганидан сўнг январь ойидан буён ушбу лавозим бўш турганди. У «Адолат» социал-демократик партияси раиси бўлган.
Олимжон Хамитович Исмаилов беш йил муддатга Олий суд раисининг ўринбосари — судлов ҳайъати раиси лавозимига сайланди.
Бунгача у Тошкент вилояти суди раисининг ўринбосари — Фуқаролик ишлари бўйича судлов ҳайъати раиси лавозимларида ишлаб келган. Мазкур лавозим июнь ойида Халилилло Тўрахўжаев Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси этиб сайланганидан сўнг бўшаб қолган эди.
Эслатиб ўтамиз, Олий суд раиси Бахтиёр Исломов ҳисобланади. У 2022 йил августда ушбу лавозимга сайланган.
