Шавкат Мирзиёев 23 сентябрь куни бўлиб ўтган йиғилишда қурилиш соҳасидаги қонунбузарликлар ҳақида гапирди.
Жумладан, ўтган йили 1 минг 600 та объект қурилиши рўйхатдан ўтмасдан бошланган бўлса, жорий йил бошидан буён бундай объектлар сони 2 минг 200 тага етди.
Бундан ташқари, қурилиш объектларининг тоифасига қараб, улар ойига камида 2−4 марта текширилиши керак. Лекин 8 ой давомида1150 та объектга инспектор бир марта борган.
Оқибатда жойларда пала-партиш қурилиш кўпайиб, аҳоли эътирозига сабаб бўляпти.
Президент Қурилиш вазирлиги, Қурилиш соҳасидаги назорат инспекцияси ва Бош прокуратурага қурилишда бюрократик тўсиқлар ва коррупцияга қарши курашиш ишларини кучайтиришни топширди.
Шу муносабат билан инспекциянинг ҳудудий бошқармаларида қурилиш-операторлар штаби ташкил қилиниши белгиланди. Назорат инспекторлари бодикамера билан таъминланади.
Давлат ҳисобидан қурилаётган ҳар бир объектга тоифасига қараб камида 2 тадан видеокамера ўрнатилади. Улар операторлар штабига маълумотларни онлайн юборади.
Шунингдек, ноқонуний қурилишлар бўйича маҳалла раислари ва жамоатчилик назоратини кучайтириш режалантирилмоқда.
Эндиликда ҳар бир қурилаётган объект олдида QR кодли паспорти чиқариб қўйилади, исталган одам бу орқали ҳудудда қандай объект қурилаётгани, қачон рухсат олингани, ким қуриши, қачон ишга тушиши каби маълумотлар олиши мумкин бўлади.
Агар QR кодли паспорт бўлмаса, қурилиш ноқонуний ҳисобланади.
Июль ойида Қурилиш назорати инспекцияси ҳукумат тасарруфига ўтказилаётгани ва энди Қурилиш вазирлигига ҳисобот бермаслиги хабар қилинган эди. Инспекцияга янги ваколатлар берилган. Рухсатсиз ёки лойиҳадан четга чиққан ҳолда қурилган бинолар учун жазо чораларини кучайтириш режалаштирилган.
