Венгрия пойтахти Будапештда бўлиб ўтган 2024 йилги шахмат Олимпиадасида қатнашган Ўзбекистон терма жамоаси 24 сентябрь куни Тошкент халқаро аэропортида тантанали кутиб олинди. «Газета.uz» фотомухбири Мурод Юсуф ушбу маросимдан фоторепортаж тайёрлади.
Унда спорт вазири Адҳам Икрамов, Маҳаллалар уюшмаси раиси Қаҳрамон Қуронбоев, Маънавият ва маърифат маркази раҳбари Отабек Ҳасанов, Тошкент шаҳри ҳокими ўринбосари Дурдона Раҳимова иштирок этди. Шунингдек, жамоатчилик вакиллари, спортчиларнинг яқинлари ва журналистлар ҳам қатнашди.
Маросимда Президент администрациясининг ижтимоий ривожланиш департаменти бошлиғи Одил Абдураҳмонов давлат раҳбарининг шахмат Олимпиадаси иштирокчиларига йўллаган табригини ўқиб эшиттирди.
Аэропортда шахмат Олимпиадасида умумжамоа ҳисобида 3-ўринни эгаллаган Ўзбекистон эркаклар жамоасининг ҳар бир аъзосига BYD Chazor автомобили совға қилинди.
Маълумот учун, Ўзбекистоннинг эркаклар жамоаси 189 мамлакат орасида умумжамоа ҳисобида 3-ўринни эгаллади. Шунингдек, тахталар кесимида Шамсиддин Воҳидов олтин, Нодирбек Абдусатторов кумуш медаль эгасига айланди. Аёллар жамоаси эса ўзининг аввалги натижаси (19-ўрин)ни яхшилаб, 169 мамлакат орасида 12-ўринни эгаллади. Шунингдек, Нодира Нодиржонова эса ўз тахтасида иккинчи энг яхши натижани қайд этиб, кумуш медални қўлга киритди.
Фото
