Туркиянинг Onur Group компанияси Ўзбекистондаги йўлларни реконструкция қилишда иштирок этиш ниятида, дея хабар қилмоқда Иқтисодиёт ва молия вазирлиги матбуот хизмати.
20 сентябрь куни компаниянинг Молдова ва Руминия давлатларидаги лойиҳалар бўйича директори Булент Татар вазирлик раҳбарияти билан учрашди.
Томонлар давлат-хусусий шериклик асосида 4P12 Бектемир- Чирчиқ — Ғазалкент- Чорбоғ автомобиль йўлининг 6−77 км қисмини асфальт-бетон қоплама билан реконструкция қилиш лойиҳаси юзасидан музокаралар олиб борди. Уни пулли йўлга ўтказиш режалаштирилмоқда.
Харита: Яндекс.
Лойиҳа 18 сентябрь куни Onur Group компанияси экспертлари, Иқтисодиёт ва молия вазирлиги ҳамда Автомобиль йўллари қўмитаси ходимлари иштирокида жойига чиққан ҳолда ўрганилган. Учрашув якунида томонлар «лойиҳани амалга ошириш бўйича тегишли ҳужжатларни тайёрлаш ва уни амалга ошириш» бўйича кейинги қадамларни белгилаб олиш юзасидан келишувга эришган.
Автомобиль йўллари қўмитаси матбуот хизматининг аниқлик киритишича, транспорт вазирлиги ушбу пулли йўл учун ҳали тендер ўтказмаган. Вазирлик ушбу компаниянинг таклифлари кўриб чиқилганини ва лойиҳанинг техник-иқтисодий асослари ҳали ишлаб чиқилмаганини маълум қилди. Шундан сўнг, тендер ўтказилади ва лойиҳа пудратчиси аниқланади, дея билдирди вазирлик.
Вазирлик маълумотларига кўра, 1981 йилда ташкил этилган Onur Group қурилиш ва инжиниринг соҳасида иш олиб боради, хусусан, кўприклар, туннеллар, тўғонлар, аэропортлар, трамвай ва темирйўллар, шунингдек, шаҳарлар қурилиши лойиҳаларини амалга ошириш тажрибасига эга. Компания Туркия, Украина, Хорватия, Тунис, Молдова, Саудия Арабистони, Ўмон, Қатар, Экваториал Гвинея ва Туркманистон каби 13 мамлакатда қурилиш лойиҳаларини амалга оширади.
