Шахмат бўйича 14-жаҳон чемпиони, Будапештдаги шахмат олимпиадасида Ўзбекистон терма жамоаси мураббийи бўлган россиялик гроссмейстер Владимир Крамник ChessBase India нашрига берган интервьюсида турнирдаги якуний натижадан мамнун эканини айтди.
Унинг сўзларига кўра, Ўзбекистон шахматчилари Олимпиадада рейтинг бўйича АҚШ (ўртача рейтинг — 2757), Ҳиндистон (2753) ва Хитойдан (2724) кейин тўртинчи (2690) бўлган, бироқ «яхши курашган, деярли иккинчи ўринни эгаллаган».
«Баъзи ўйинлар бошқача якунланиши мумкин эди,шунда иккинчи ўринни эгаллаган бўлардик. Лекин, тўғрисини айтсам, учинчи ўрин ҳам — ёш жамоа учун муваффақият. Ҳозирча Ҳиндистон билан ўзимизни таққослай олмаймиз, лекин йигитлар яхши курашди. Ёш шахматчиларга хос бўлган кераксиз хатолар бўлди, аммо бу барибир яхши тажриба бўлди», — деди у.
Владимир Крамник бир йил аввал Ўзбекистон шахмат федерацияси билан ҳамкорликни бошлаганини ва шахматчилар билан бир неча онлайн ва офлайн сессиялар ўтказганини айтди.
«Биз қийин ўйинларни ўтказдик, кучли жамоаларга қарши ўйнадик. Баъзида учта шахматчи билан машғулот ўтказишга тўғри келди — эрталаб, кечқурун ва тунда. Охирги уч кечада мен 3−4 соат ухладим. Ўйлайманки, бугун тунда яхши ухлай оламан», — деди у.
Собиқ жаҳон чемпиони жаҳон рейтингининг кучли 10 талигидан жой олган Нодирбек Абдусатторов ва бошқа ёш шахматчиларнинг савиясига ҳам баҳо берди.
«Нодирбекнинг (ёш авлоднинг бошқа вакиллари Доммаражу Гукеш, Аржун Эригайси, Рамешбабу Прагнанандҳа билан — таҳр.) умумий жиҳати шундаки, улар топ шахматчилар ва жуда-жуда узоқ вақт давомида энг юқори даражада қолади. Улар ростдан ҳам шу ерда бўлиши керак. Нодирбек билан муҳокама, таҳлил қилганимизда, у билан бир тилда гаплашамиз! Албатта, мен ортиқ топ шахматчи эмасман, лекин тушунчам ҳали ҳам яхши бўлиши мумкин!», — деди у.
Россиялик гроссмейстернинг фикрича, яқин йилларда дунёнинг энг яхши 10 нафар шахматчиси рўйхати нафақат рейтингда, балки куч жиҳатидан ҳам ўзгаради ва улар кейинги 10−20 йил давомида ҳам шу даражада қолади.
«Мен Нодирбекка қойил қолдим, албатта, сизнинг ҳиндистонлик йигитларингиз каби эмас. У жуда, жуда яхши. Нодирбек аллақачон топ ўйинчи», — таъкидлади у.
Эслатиб ўтамиз, Ўзбекистон шахмат олимпиадасида 189 давлат орасида учинчи ўринни эгаллади. Шахматчи Шамсиддин Воҳидов олтин, Нодирбек Абдусатторов кумуш медаль билан тақдирланди. Аёллар терма жамоаси 169 мамлакат ичида 12-ўринни эгаллади, Нодира Нодиржонова эса ўз рейтингида иккинчи энг яхши натижани қайд этди.
