Фарғона вилояти Учкўприк туманида поезд вагонлари устида селфи тушмоқчи бўлган икки йигитни 27 минг вольтли ток урди. Бу ҳақда SevimliTV телеканалининг Zamon дастурида хабар берилди.
Қайд этилишича, ҳолат 17 сентябрь куни соат 13:00 атрофида содир бўлган. Бу ҳақда хабар келганидан сўнг Транспортда хавфсизликни таъминлаш бошқармаси тергов тезкор гуруҳи воқеа жойига етиб борган.
Терговга қадар текширув ҳаракатлари давомида аниқланишича, Бувайда туманига қарашли 1-сонли мактабнинг 2 нафар 10-синф ва 1 нафар 8-синф ўқувчилари Учкўприк туманидаги Қақир темирйўл бекатига келган. Темирйўл изларини белгиланмаган жойидан кесиб ўтиб, тақиқланган ҳудудга кирган.
Сўнгра улар бекатда турган буғдой ташувчи вагоннинг устига чиқиб, селфи тушмоқчи бўлган вақтларида эҳтиётсизлиги оқибатида икки нафар ўсмирни юқори кучланишли электр токи урган.
Турли даражада тан жароҳатлари олган болалар тез тиббий ёрдам машинасида шифохонага юборилган. Улардан бири жонлантириш бўлимига ўтказилган, танасининг 65 фоиз куйгани айтилмоқда.
Иккинчи беморга тананинг термик куйиш ва ўнг оёқ сон суяги синиши ташхиси билан ёрдам кўрсатилган ва яшаш жойига даволанишга ўтказилган, дейилади хабарда.
