Август-сентябрь ойларида давлат буюртмачилари томонидан жами 3,1 миллиард сўмлик 11 та давлат харидида қонун бузилиши ҳолатларига йўл қўйилган, деб хабар берди Коррупцияга қарши курашиш агентлиги матбуот хизмати.
Жумладан, қуйидаги давлат харидларида манфаатлар тўқнашувига йўл қўйилган:
- Нарпай тумани тиббиёт бирлашмасининг 673 миллион сўмлик;
- Шуманай тумани йўллардан фойдаланиш давлат муассасасининг 343 миллион сўмлик;
- Каттақўргон тумани мактабгача ва мактаб таълими бўлимининг 215 миллион сўмлик;
- Олтинсой тумани ҳокимлигининг 193 миллион сўмлик;
- Қумқўрғон тумани 2-сон касб-ҳунар мактабининг 115 миллион сўмлик;
- Бухоро Давлат педагогика институти ҳузуридаги академик лицейнинг 56 миллион сўмлик давлат харидлари.
Шунингдек, «Қамчиқавтойўл» ихтисослаштирилган йўллардан фойдаланиш корхонаси буюртмачилигида ўтказилган 1,5 миллиард сўмлик давлат харидида ўзаро аффилланган шахслар иштирок этишига йўл қўйилган.
Агентликнинг тақдимномаларига асосан харид комиссиясининг ғолибни аниқлаш ҳақидаги баённомалари бекор қилиниб, мазкур давлат харидларининг қонунга хилоф равишда ўтказилишининг олди олинди.
Ўрганиш ва таҳлиллар жараёнида тўпланган ҳужжатлар қонуний чора кўриш учун ҳуқуқни муҳофаза қилувчи органларга юборилди.
