Футзал бўйича 2024 йилги жаҳон чемпионатининг плей-офф босқичи бошланди. 24 сентябрь куни Бухорода Бразилия — Коста-Рика, Тошкентда эса Нидерландия — Украина баҳслари бўлиб ўтди. Бухорода ўтган баҳсда Бразилия катта қийинчиликсиз ғалаба қозонди, пойтахтдаги «Ҳумо Арена»да ташкил этилган ўйинда эса Украинага чорак финал йўлланмасини қўлга киритиш осон кечгани йўқ.
ФИФА матбуот хизматининг қайд этишича, Коста-Рика ва айниқса Нидерландия уйга бошни баланд кўтарган ҳолда қайтса арзийди, зотан Европа вакиллари 24 йил деганда биринчи марта жаҳон чемпионатида қатнашиб, ҳаваскор футзалчилар билан ўйнашига қарамай, гуруҳ босқичида бирорта ҳам мағлубиятга учрамай (Нидерландия Ўзбекистон билан бир гуруҳдан ўрин олганди), плей-оффга чиқа олди ва чорак финалга чиқиш учун ҳам охиригача ҳаракат қилди.
Бразилия энди чорак финалда Эрон — Марокаш жуфтлиги ғолибига қарши ўйнашга тайёргарлик кўрса, Украина Испания — Венесуэла қарама-қаршилигида ғолиб чиққан жамоа билан ўйнайди.
Нимчорак финал
24 сентябрь, сешанба
Бразилия — Коста-Рика 5:0 (видео)
Голлар: Марсель (5), Фелипе Валерио (12), Леандро Лино (28), Негиньо (36, 40).
Учрашувнинг энг яхши ўйинчиси: Негиньо (Бразилия).
Бразилиялик Марсель жорий жаҳон чемпионатининг тўрт ўйинида рақиблар дарвозасига 9 та гол урди. ФИФА матбуот хизматининг қайд этишича, худди шунча гол 2012 йили Таиландда бўлган мундиалда Эдер Лимага, 2021 йили эса Литвада бўлган жаҳон чемпионатда Ферраога мусобақа «Олтин бутса»сини қўлга киритиш учун етарли бўлганди.
Нидерландия — Украина 1:3 (видео)
Голлар: Саид Бузамбу (29) — Михаил Зварич (6), Андрей Мельник (31, 40).
Учрашувнинг энг яхши ўйинчиси: Андрей Мельник (Украина).
Андрей Мельник футзал бўйича жаҳон чемпионатларининг плей-офф босқичида бир ўйинда биттадан ортиқ гол урган иккинчи украиналик футболчига айланди. Бунгача 2012 йили Таиландда ўтган мундиалнинг нимчорак финалида Денис Овсянников бир дақиқа ичида Япония дарвозасига иккита гол урганди, охир-оқибат ўйин Украинанинг 6:3 ҳисобидаги ғалабаси билан тугаган.
Навбатдаги учрашувлар
25 сентябрь куни нимчорак финал доирасида Андижонда Испания — Венесуэла (Тошкент вақти билан соат 17:30 да бошланади), Тошкентда эса Парагвай — Афғонистон (соат 20:00 да бошланади) учрашувлари бўлиб ўтади.
25 сентябрь, чоршанба
17:30. Андижон
Испания — Венесуэла
20:00. Тошкент
Парагвай — Афғонистон
26 сентябрь, пайшанба
17:30. Бухоро
Эрон — Марокаш
20:00. Андижон
Португалия — Қозоғистон
27 сентябрь, жума
17:30. Бухоро
Таиланд — Франция
20:00. Тошкент
Аргентина — Хорватия
