Истиқболли лойиҳалар миллий агентлиги (ИЛМА — Ўзбекистондаги криптосиёсат регулятори) Hamster Kombat ўйини ва унинг HMSTR криптоактивлари билан боғлиқ саволларга жавоб берди. Хусусан, ИЛМА ўзбекистонликлар бундай ўйинларда листинг жараёнидан ўтган криптоактивларни қандай қилиб қонуний равишда сотиб олиши ёки сотиши мумкинлиги, фуқаролар ушбу криптоактивлар билан қандай ва қаерда операция қилиши мумкинлигини тушунтирди.
Spotʼнинг ёзишича, The Hamster Foundation мини-иловаси ишлаб чиқувчилари томонидан чиқарилган токен 131 миллион ўйинчи ўртасида тақсимланади. HMSTRнинг умумий эмиссияси 100 миллиард токенни ташкил этади, шундан 20 сентябрь куни якунланган биринчи мавсум натижаларига кўра ўйинчиларга 60 миллиард токенлар тарқатилади. Hamster Kombat листинги (токенни биржа рўйхатига киритиш) ҳақида аллақачон Binance, OKX, Bybit, Bitget ва яна бир нечта иккинчи эшелон криптосавдо платформалари эълон қилди. Уларнинг аксарияти пре-маркет платформаларида HMSTR дастлабки савдоларини аллақачон бошлаган.
Coinmarketcap портали маълумотларига кўра, токен #32195 рақамли ягона крипто-актив идентификаторини (UCID) олди. 26 сентябрь куни у Binance криптобиржасида муомалага киради.
«Қабул қилинган HMSTR токенларини фақат крипто-активлар айланмаси соҳасидаги миллий хизмат кўрсатувчи провайдерлар орқали, агар улар крипто-биржа котировка рўйхатига ёки крипто-дўконнинг савдо саватига киритилган бўлса, харид қилиш ёки сотиш мумкин бўлади», — дейилади ИЛМА хабарида.
Агентлик ушбу турдаги токенлар жуда ўзгарувчан бўлиб, аксарият ҳолларда фойдали функционаллиги йўқлиги сабабли рўйхатга киритилгандан сўнг қисқа вақт ичида қадрсизланишини такидлаган.
Бундан ташқари, Ўзбекистонда криптоактивнинг тури ёки номидан қатъи назар, криптоактивлар айланмаси соҳасидаги қонунчиликни бузганлик учун маъмурий ва жиноий жавобгарлик чоралари қонунчилик даражасида белгиланган.
Агентлик томонидан фуқаролар ҳушёр бўлишга ва лойиҳа бўйича норасмий ахборот манбалари орқали олинган маълумотларга ишонмасликка, шунингдек, фирибгарлик схемалари қурбонига айланмаслик учун ушбу токенларни сотиб олиш/сотиш бўйича ўз хизматларини таклиф қилаётган шахсларга ишонмасликка чақирилди.
Июнь ойида Ўзбекистонда бир ой ичида криптоактивлар айланмаси соҳасидаги қоидабузарликлар учун камида 12 киши жавобгарликка тортилгани ҳақида хабар берган эдик. Улар, асосан, мамлакатда лицензияси бўлмаган Бинанcэ биржаси орқали криптовалюта савдо қилгани учун жазоланган. Июнь ойида Тошкентдаги суд Notcoin сотган Термиз давлат университети талабасига 10 сутка қамоқ жазоси тайинланган эди. Унинг Galaxy A30 телефони ва банк картасини йўқ қилинган. «Газетa.uz» талаба билан интервью ҳам уюштирганди.
Hamster Kombat — бу фойдаланувчиларга криптобиржа директори ролини синаб кўриш ва «тап»лар, тангалар тўплаш, пассив даромад олиш, ўз даромад стратегиясини ишлаб чиқиш, шунингдек, янги ўйинчиларни жалб қилиш орқали токенларни ишлаб олишни таклиф қиладиган иловадир. The Bell нашрининг ўйин ишлаб чиқувчилари билан таниш бўлган манбаларининг хабар беришича, кликер асосчиларидан бири россиялик IT-тадбиркор Эдуард Гуриновичдир. Таъкидланишича, Hamster Kombat «айланмаси» кунига бир неча миллион долларга етади ва пул реклама берувчилардан тушади.
