Собиқ мудофаа вазири Шигеру Ишиба Япония Либерал-демократик партиясининг (ЛДП) янги раиси этиб сайланди, дея Kyodo хабар берди.
Овоз беришнинг икки босқичи натижаларига кўра, Ишиба 409 тадан 215 та овоз олди. Жами партия раҳбари лавозимига тўққиз нафар номзод даъвогарлик қилди.
Ишибанинг асосий рақиби Япония иқтисодий хавфсизлик вазири, 63 ёшли Санаэ Такаити эди — у 194 овоз олди.
ЛДП парламентда кўпчилик овозга эга, шунинг учун 1 октябрь куни парламент томонидан тасдиқлангандан сўнг Исиба мамлакат бош вазири бўлади. У сиёсий можаролар фонида иккинчи муддатга сайланмасликка қарор қилган Япония бош вазири Фумио Кишиданинг ўрнини эгаллайди.
BBCнинг таъкидлашича, 67 ёшли Ишиба жамоатчилик фикрини ўрганиш бўйича ўтказилган сўровларнинг аксариятида етакчилик қилган. Бу унинг бешинчи уриниши ва сиёсатчининг сўзларига кўра, ЛДПни бошқарган сўнгги уриниши эди.
Бўлажак бош вазир ўзининг либерал қарашлари билан машҳур. У, хусусан, император хонадони аёлларининг император тахтини эгаллашлари тарафдори эди. Бу япон жамияти учун жуда баҳсли мавзу бўлиб, ЛДПнинг кўплаб аъзолари ҳам бунга қарши чиқишмоқда.
Ишиба, шунингдек, аёлларга никоҳда қизлик фамилиясини сақлаб қолиш имконини берувчи қонунни қўллаб-қувватлайди, бу эса ЛДП консерватив вакилларининг қаршилигига сабаб бўлди. Унга ютқизган Такайити аксинча, анъанавий оилавий қадриятларни ёқлаб чиқди.
Бундан ташқари, Ишида Кишидани омма олдида танқид қилди, бу япон сиёсатида кам учрайдиган ҳолатдир. Унинг кескин очиқлиги партия ичида норозилик уйғотган бўлсада, жамоатчилик томонидан эътироф этилди, деб ёзади BBC. Бир куни у ҳамкасблари билан мулоқотдан кўра китоб ўқишни афзал кўришини ва кунига учтадан китоб ўқишини айтган.
Хавфсизлик соҳасида Ишида Хитой ва Тайван ўртасидаги юқори кескинлик туфайли минтақада НАТОнинг Осиё версиясини яратишни таклиф қилмоқда, деб ёзади Кёдо. Бироқ, у ёмон кунларни бошдан кечираётган Япония иқтисодиётини қандай бошқариши ноаниқлигича қолмоқда, деб таъкидлайди нашр. Аввалроқ сиёсатчи молиявий даромадларга юқори солиқ жорий этиш ғоясини илгари сурган эди.
Япониянинг ички кун тартибидаги яна бир муҳим мавзу — аҳолининг қариши ва қисқариши масаласидир. Бу ижтимоий ва тиббий хизматларга босим ўтказади ва ўрта ва узоқ муддатли истиқболда муаммони келтириб чиқаради. ЛДПнинг янги раҳбари, шунингдек, ҳукумат Япониянинг меҳнат бозорини бошқариш ва иммиграцияга нисбатан сиёсатини қайта кўриб чиқиши керак бўлади, дея қўшимча қилади BBC.
