Тошкент вилоятининг Қибрай туманида жойлашган Ўрмон хўжалиги агентлиги ва Тошкент давлат аграр университети биноларида 30 сентябрь куни ёнғин содир бўлган эди. Икки соатдан ортиқ давом этган ёнғинни ўчириш учун 15 дан ортиқ ўт ўчириш экипажи жалб қилинган эди.
Ҳодиса оқибатида ОТМнинг икки биноси ва агентликнинг бир биноси зарарланган. ФВВнинг қайд этишича, жароҳат олган ва ҳалок бўлганлар тўғрисида маълумот келиб тушмаган. Ҳолат юзасидан Жиноят кодексининг 259-моддаси 2-қисми (Ёнғин хавфсизлиги қоидаларини бузиш одам ўлими ёки бошқа оғир оқибатлар келиб чиқишига сабаб бўлса) билан жиноят иши қўзғатилган.
Айни вақтда, ёнғин сабабларига доир дастлабки ахборот эълон қилинганича йўқ, етказилган зарар миқдори ҳақида ҳам расмий маълумот берилмади.
Университет матбуот хизматининг маълум қилишича, олийгоҳда дарс жараёнлари узлуксиз давом этмоқда. Ёнғиндан зарар кўрган биноларда таҳсил олган талабаларнинг ўқиши университет ҳудудига яқин бўлган Тошкент Креатив технологиялар маркази ва Тошкент педиатрия институти қошидаги академик лицейга вақтинча кўчирилган.
«Газета.uz» мухбири Шоҳруҳ Ҳайдаров 2 октябрь куни ҳодиса жойида бўлиб, ёнғин оқибатларини фотосуратларга муҳрлади.
Ёнғин содир бўлган бинолар жойлашган жой таҳририят томонидан ажратиб кўрсатилган.
Ўрмон хўжалиги агентлиги биноси олди
