Исроил яқин кунларда Эроннинг ракета ҳужумига «муҳим жавоб зарбаси»ни беради, деб ёзади Axios Исроил расмийларига таяниб.
Нишонлар Эрондаги нефть қазиб олиш ва бошқа стратегик объектлар бўлиши мумкин. Нашр суҳбатдошлари, шунингдек, Эроннинг ҳаво ҳужумидан мудофаа тизимларини йўқ қилишни истисно қилмаяпти.
Axios маълумотларига кўра, Исроил хавфсизлик вазирлари маҳкамаси бир кун аввал бўлиб ўтган йиғилишда Эронга ҳарбий жавобни муҳокама қилган, аммо якуний қарор қабул қилмаган, чунки Исроил ҳукумати «стратегик оқибатлар» туфайли АҚШ президенти маъмурияти билан маслаҳатлашмоқчи.
Эрон ҳужуми ҳақида
1 октябрь куни кечқурун Эрон Исроил ҳудудига энг оммавий ракета зарбаларидан бирини берди. Эрон Ислом инқилоби қўриқчилари корпуси (ЭИҚК) ҳужумни ҲАМАС етакчиларидан бири Исмоил Ҳания, «Ҳизбуллоҳ» (Эронни қўллаб-қувватловчи) ҳаракати етакчиси Ҳасан Насруллоҳ ва ЭИҚК қўмондонларидан бири Аббос Нилфрушаннинг «шаҳидлиги»га жавоб деб атади.
Турли ҳисоб-китобларга кўра, Эрон 180 дан 200 гача баллистик ракеталар учирган. Исроил ва Америка ҳаво ҳужумидан мудофаа тизимлари уларнинг кўпчилигини ушлаб олишга муваффақ бўлди, деб таъкидлайди Ахиос. Ушланмаганлар асосан мамлакатнинг жанубидаги Ҳарбий ҳаво кучлари базаси, Тел-Авивдан шимолда жойлашган ҳарбий разведка базаси, шунингдек, «Моссад» штаб-квартираси яқинидаги очиқ майдонларга тушган.
Исроил бош вазири Бинямин Нетаняху Эрон ҳаракатларини катта хато деб атади ва уни жавобгарликка тортишга ваъда берди. «Эрон режими ўзимизни ҳимоя қилиш ва душманларимиздан ўч олишга бўлган қатъиятимизни тушунмаяпти. Улар тушуниб олишади. Биз ўзимиз белгилаган қоидага риоя қиламиз: ким бизга ҳужум қилса, биз унга ҳужум қиламиз», — деди ўз мурожаатида Нетаняху.
Агар Исроил куч билан жавоб берса, Эрон яна янги ҳужум билан таҳдид қилди. Исроил расмийлари ўшанда барча вариантларни, шу жумладан Эроннинг ядровий объектларига зарба беришни кўриб чиқишга тайёрлигини билдирди.
Wall Street Journal араб амалдорлари орасидаги суҳбатдошларига таяниб, Исроил Эронга ўз ҳудудидаги ҳар қандай отишмаларга жавоб бериш нияти ҳақида аниқ огоҳлантиришлар юборганини ёзади. Уларнинг сўзларига кўра, Исроил Эроннинг ядровий ёки нефть объектларига тўғридан-тўғри зарба беришини айтган.
Исроил Эроннинг ядровий объектларига зарба бериш сценарийсини кўриб чиқаётгани ҳақида америкалик амалдорлар ҳам The New York Times нашрига маълум қилишди. Хусусан, гап Эрон ядровий дастурининг юраги бўлган Нетез шаҳридаги бойитиш объектлари ҳақида бормоқда.
CNN билан суҳбатлашган таҳлилчиларнинг фикрича, Исроил Эроннинг ядровий объектларини анъанавий ҳарбий ҳужум ёки «Ҳизбуллоҳ» пейжерлари ва рацияларини портлатишда қўлланилган киберҳужум билан нишонга олиши мумкин.
«Исроил нима қилмасин, бу жуда сезиларли бўлиши ва қатъий ва муваффақиятли кўриниши керак», — деди Австралия Стратегик сиёсат институтида мудофаа стратегияси бўйича катта таҳлилчи Малколм Девис.
АҚШнинг ҳисоб-китобларига кўра, Эрон ядро қуроли учун етарли миқдорда қурол-яроғ ишлаб чиқариш учун тахминан бир-икки ҳафта вақт сарфлайди. «Исроил нуқтаи назаридан, у Эронга ядровий қурол олишга йўл қўя олмайди. Шубҳасиз, Нетаняхунинг кабинетида ушбу ядровий объектларга ҳужум қилиш ва аслида Эроннинг ядровий қурол дастурини ортга қайтариш учун кучли босим бўлади,» — деди Девис CNN телеканалида.
Теҳрон, шу билан бирга, «бир оз вазминлик» бўлишига умид қилмоқда, деб ҳисоблайди Chatham House (Буюк Британия) таҳлилий марказининг Яқин Шарқ ва Шимолий Африка бўйича дастур директори Салам Вакил.
«Эрон ўзининг мудофаа позициясида эканлигини, „Ҳизбуллоҳ“ таҳдид остида эканлигини ва Исроилга қарши курашиш учун анъанавий имкониятларга эга эмаслигини жуда яхши тушуниб, баъзи қизил чизиқларни ўрнатишга ҳаракат қилмоқда,» — дея қўшимча қилди Вакил.
