Ўзбекистон Швейцариянинг Stadler компаниясидан иккита поезд сотиб олиш ниятида. Бу ҳақда 30 сентябрь куни Сенат йиғилишида транспорт вазири Илҳом Маҳкамов маълум қилди, дея хабар беради «Газета.uz» мухбири.
Унинг сўзларига кўра, янги поездлар мамлакат темир йўлларида синовдан ўтказилади, сўнгра ушбу поездларнинг катта партиясини сотиб олиш имконияти бўйича қарор қабул қилинади.
Транспорт вазирлиги раҳбари 13 сентябрь куни Stadler Rail компаниясининг МДҲ давлатлари бўйича раиси Александр Луфт билан учрашувда ўзаро ҳамкорликни муҳокама қилганди.
Унда томонлар ҳамкорликнинг потенциал йўналишларини, жумладан, электропоездларни харид қилиш, хизмат кўрсатиш бўйича маҳаллий мутахассисларни тайёрлаш, шунингдек, харид қилинадиган маҳсулотларни Ўзбекистонда маҳаллийлаштириш имкониятларини муҳокама қилди.
Музокаралар якунида томонлар Ўзбекистон Республикаси йўловчи темир йўл тармоғи эҳтиёжларига мувофиқ компаниянинг потенциал имкониятларини ва Stadler МДҲ ишлаб чиқариш ва хизмат кўрсатишнинг ҳар бир сегменти учун компаниянинг нарх сиёсатини батафсил ўрганиш бўйича келишувга эришди.
2019 йилда Stadler «Ўзбекистон темир йўллари» аксиядорлик жамияти билан Ўзбекистонда енгил вагонлар ишлаб чиқариш, шунингдек, уларни Марказий Осиё мамлакатларига келгусида экспорт қилиш масалаларини муҳокама қилган.
Компания «Ўзбекистон темир йўллари» аксиядорлик жамияти томонидан 34 та электропоезд сотиб олиш бўйича тендерда ҳам иштирок этган.
Эслатиб ўтамиз, Ўзбекистон Жанубий Кореянинг Hyundai Rotem компаниясидан ҳам 6 та тезюрар поезд харид қилмоқда ва Чехиянинг Skoda компаниясидан 30 та электропоезд харид қилишни режалаштирмоқда. Бунинг учун давлат кафолати остида 535 млн евро миқдорида кредитлар жалб этилади.
Stadler Rail Швейцария темир йўл ҳаракат таркиби ишлаб чиқарувчиси бўлиб, унинг асосий эътибори минтақавий поездлар ва трамвайларга қаратилган. Бош офис Швейцариянинг Буснанг шаҳрида жойлашган. Холдинг компанияси Жазоир, Германия, Италия, Нидерландия, Австрия, Польша, Швейцария, Испания, Чехия, Венгрия, Беларусь ва АҚШда жойлашган тўққизта шуъба корхоналаридан иборат.
