Ўзбекистонда яна бир таниқли шахс ўзининг Йўл ҳаракати қоидаларини қўпол равишда бузганини кўрсатган видеони тармоқларда эълон қилди. Хонанда Жаҳонгир Отажонов Zeekr автомобилида 195 км/соат тезликка чиқди.
Видеога кўра, у тезлик меъёрини аҳоли гавжум ҳудуддан ташқарида бузган бўлиши мумкин, чунки ўша ерда рухсат этилган максимал тезлик 100 км/соат (айрим ҳудудларда — 110 км/соат) бўлган. Отажонов бир қўли билан рулни ушлаб, иккинчи қўли билан спидометр кўрсаткичларини телефонда видеога ёзиб олган. Тасвирларни Жаҳонгир Отажоновнинг ўзи Instagram`да эълон қилди.
«Кеча Zeekr [тезлиги] нечагача чиқаркан, деб сўрашганди. Қани, кўрамиз… Ман 195 км/соатгача чиқардим. Буёғига ҳаракат таркиби кўп экан. Тўғриси, яна ҳайдашга қўрқдим. Балки 200 км/соат тезликка ҳам чиқар, билмадим», — деди у.
Видеога эътибор қаратилса, видео давомида у пиёдалар ўтиш жойидан ҳам 150 км/соат тезликда ўтганини кўриш мумкин.
Ўзбекистон ИИБ ЙҲХБ матбуот хизмати «Газета.uz»нинг хонандага нисбатан чора кўрилиши ҳақидаги саволига «Албатта, чора кўрилади», деб жавоб берди.
29 сентябрь куни Жаҳонгир Отажонов 46 ёшга тўлди ва туғилган куни учун Zeekr автомобили харид қилганини маълум қилганди.
Эслатиб ўтамиз, 2021 йилда қўшиқчи президентлик сайловларида иштирок этишни режа қилганди, бироқ кейинчалик сиёсатдан кетишини эълон қилди.
Йўлда тезлик чекловларини бузган ҳолда машина ҳайдаганлар орасида бокс бўйича Парижда бўлиб ўтган Олимпиада чемпиони Асадхўжа Мўйдинхўжаев ҳам бор. У 23 сентябрь куни президент совғаси дея берилган автомашинада Тошкент марказида тезликни 110 км/соатга (шаҳарларда белгиланган тезлик 60 км/соат) ошириб, йўл ҳаракати қоидаларини бузди. Видеони ўзи Instagram`га жойлади (кейинчалик ўчириб ташлади). Спортчи БҲМнинг 9 баравари (3,06 миллион сўм) миқдорида жаримага тортилди ва у билан «профилактик суҳбат» ўтказилди.
Сентябрь ойи охирида блогер Нигина Мелиқўзиева йўлда машинасида «шашка ўйини» қилгани учун жавобгарликка тортилди. У билан ҳам профилактик суҳбат ҳам ўтказилди. Блогер бундай ҳайдашини «азартда бўлгани» билан изоҳлади, шунингдек, юртдошлари ва обуначиларидан «узр сўради». Унга БҲМнинг 10 баравари (3,4 миллион сўм) миқдорида жарима белгиланди.
Балли тизим
Ўзбекистонда 2018 йил май ойида қабул қилинган 2018−2022 йилларда Ўзбекистонда йўл ҳаракати хавфсизлигини таъминлаш концепциясида кўп маротаба қоидабузарлик учун ҳайдовчилик ҳуқуқидан маҳрум қилишни назарда тутувчи жарима баллари тизимини жорий этиш назарда тутилганди. Бу ҳақдаги ҳужжат лойиҳасини 2019 йилда ишлаб чиқиш режалаштирилган. Тизимни 2022 йил 1 декабрдан ишга тушириш режа қилинган эди, бироқ ҳали тегишли қонун қабул қилинмаган.
Олий Мажлис Қонунчилик палатаси қонунни 2023 йил 28 ноябрда қабул қилган, бироқ ҳужжатни ишлаб чиқувчилар унга обрўсизлантириш мақсадида ҳуқуқни муҳофаза қилувчи орган ходимларини суратга олганлик учун жазо жорий этиш ҳақидаги нормани киритган, бу эса кенг жамоатчиликнинг норозилигига сабаб бўлган. Натижада Сенат қонунни муддатларни бузган ҳолда кўриб чиқиб, жорий йилнинг 16 август куни қайта кўриб чиқишлари учун қайтарган.
Собиқ депутат Расул Кушербаев манбаларга таяниб, комиссия обрўсизлантириш тўғрисидаги нормани қолдириш ниятида эканини, бироқ максимал қамоқ жазосини 15 суткадан 10 суткагача бироз юмшатиши ҳақида ёзганди.
