6 октябрь куни Ўзбекистоннинг Покистонга янги тайинланган фавқулодда ва мухтор элчиси Алишер Тўхтаев Исломободга етиб келди, деб хабар бермоқда «Дунё» ахборот агентлиги.
Бу лавозимга тайинлангунга қадар Алишер Тўхтаев Ўзбекистон ташқи ишлар вазири маслаҳатчиси лавозимида ишлаган.
Дипломат Тошкент давлат юридик институтини (ҳозирги Тошкент давлат юридик университети) тугатгач, ТИВ, Президент ҳузуридаги Стратегик ва минтақалараро тадқиқотлар институти, Президент администрациясида масъулиятли лавозимларда ишлаган.
Шунингдек, у Ўзбекистон пахта-тўқимачилик кластерлари уюшмасида ҳам аввал маслаҳатчи, сўнгра раис ўринбосари лавозимларида фаолият юритган.
Маълумот учун, Алишер Тўхтаев 2021—2024-йилларда Ўзбекистоннинг Покистондаги элчиси лавозимида ишлаб келган Ойбек Усмонов ўрнига тайинланди.
