7 октябрь куни физиология ва тиббиёт бўйича 2024 йилги Нобель мукофоти Виктор Амброс (Массачусетс университети, АҚШ) ва Гари Рувкунга (Массачусетс бош шифохонаси, Гарвард тиббиёт мактаби, АҚШ) берилди.
Мукофотни топширувчи Стокгольмдаги Қироллик Каролинска тиббий-жарроҳлик институтининг хабар беришича, мукофот олимларга микроРНКларни кашф этгани ва уларнинг ген фаолиятини транскрипциядан кейинги тартибга солишдаги ролини ўргангани учун берилди.
МикроРНКлар — бу рибонуклеин кислота молекулаларининг махсус синфи бўлиб, улар бошқа молекулалар билан бирга кўплаб генларнинг фаоллигини аниқлайди. Кўпинча маълум бир ген тананинг маълум ҳужайраларида фаол бўлиши микроРНКларга боғлиқ.
Эслатиб ўтамиз, тиббиёт ва физиология бўйича 2023 йилги Нобель мукофоти Пенсилвания университетидан Дрю Вайсман ва Каталин Карикога берилганди, уларнинг ишлари коронавирусга қарши mRNA вакциналарини яратиш учун асос бўлган.
Маълумот учун, ушбу йўналиш мукофот ҳафталигини очиб берди. 8 октябрда физика, 9 октябрда кимё, 10 октябрда адабиёт бўйича лауреатларнинг номи эълон қилинади. 11 октябр куни тинчлик мукофоти, 14 октябрда эса Альфред Нобель хотирасига иқтисод бўйича мукофот топширилади.
