Исроил мудофаа кучлари (ЦАХАЛ) Ливаннинг ғарбий жанубида «Ҳизбуллоҳ»га қарши «чекланган, локаллаштирилган» қуруқликдаги операция бошланганини эълон қилди, деб хабар бермоқда BBC News.
ЦАХАЛнинг гуруҳга қарши қуруқликдаги операциялари 30 сентябрда бошланган, бироқ асосан Ливан-Исроил чегарасининг шарқий қисмига қаратилганди.
Шунингдек, Исроил ҳарбийлари Ливан жанубидаги жанговар ҳаракатларда илк бор ЦАХАЛнинг захирадаги дивизиони иштирок этганини айтди. У қуруқликдаги ҳужумда иштирок этувчи бошқа учта бўлинмага қўшилган.
«Ҳизбуллоҳ» сўнгги 24 соат ичида Исроил артиллериясининг Дишон ва Дальтондаги позицияларига, шунингдек, Ливан чегараси яқинида жойлашган Исроил шимолидаги Йирон кибуцида «душман кучларининг концентрацияси»га ракета зарбалари берганини билдирди. Умумий ҳисобда, ЦАХАЛ маълумотларига кўра, 7 октябрь тунида гуруҳ Исроил ҳудудига 190 та ракета отган.
Исроил 23 сентябрь куни пейжерлар ва рацияларда содир бўлган қатор портлашлардан сўнг, Исроил томони «Ҳизбуллоҳ»нинг нишонлари деб даъво қилаётган ҳудудларга катта зарбалар беришни бошлаганди. 27 сентябрь куни «Ҳизбуллоҳ» етакчиси Ҳасан Насруллоҳ Исроилнинг Байрутга берган ҳаво ҳужумида ҳалок бўлган.
Ливан ҳукумати маълумотларига кўра, сўнгги уч ҳафта ичида Ливанда аллақачон 1400 дан ортиқ одам ҳалок бўлган. Мамлакатнинг 1,2 миллион аҳолиси уйларини тарк этишга мажбур бўлган, улардан 400 мингга яқини (шу жумладан, 300 мингга яқин Сурия фуқаролари) Сурияга қочиб кетган.
Исроил расмийларининг айтишича, ЦАХАЛнинг Ливандаги операциясидан мақсад ««Ҳизбуллоҳ»нинг террорчилик инфратузилмаси ва имкониятларини бузиш» ҳамда мамлакат шимолидаги Исроил фуқароларига таҳдидларни бартараф этиш ҳисобланади.
Сентябрь охирида Исроил АҚШ, Буюк Британия, БАА ва бошқа иттифоқчиларнинг Яқин Шарқда масштаблироқ урушнинг олдини олиш учун «Ҳизбуллоҳ» билан уч ҳафталик сулҳ таклифини рад этганди.
