Ўзбекистон футзал терма жамоаси бош мураббийи Хосе Венансио Лопес мамлакатдаги мураббийлик фаолиятини якунлади. У билан тузилган шартнома Жаҳон чемпионати охирига қадар имзоланганди.
7 октябрь куни ЎФА раҳбарияти ҳамда бош мураббий қатнашган йиғилишда жамоанинг Ўзбекистонда ўтган мусобақадаги иштироки танқидий кўриб чиқилди. Равшан Ирматов испаниялик мутахассисга терма жамоадаги фаолияти учун миннатдорчилик билдириб, унга омад тилади.
Йиғилишда терма жамоа ўйинидаги камчиликлар таҳлил қилиниб, уларни бартараф этиш масалалари муҳокама қилинди. Йўл қўйилган камчиликларни бартараф этиш бўйича зарур чоралар кўриш, терма жамоага номзод футболчиларни етказиб бериш йўлида турли ёш тоифасида футзал терма жамоаларини ташкил этиш, клублар ўртасидаги турнирларни кўпайтириш бўйича таклифлар берилди. Ўзбекистондаги иқтидорли ёш футзалчиларга кўпроқ ўйин амалиёти бериб, турнирларга жалб этиш орқали уларга яхши натижаларга эришиш мумкинлиги айтилди.
Хосе Венансио ЎФА раҳбариятига терма жамоа бош мураббийи сифатида ишлаш имконият берилгани учун миннатдорчилик билдирди. Ўтган мусобақалар давомида ЎФА томонидан барча шароитлар тақдим этилганини қайд этди. Испаниялик мутахассис Ўзбекистондаги фаолияти давомида завқ билан ишлагани, барча мутахассислар унга кўмаклашганини айтиб, келгусида дўстона алоқаларни сақлаб қолиб, ҳар қандай ёрдамга тайёр эканини маълум қилди.
Испаниялик мутахассис билан тузилган шартнома якунланди.
Хосе Венансио Лопес 1965 йил 27 июнда туғилган. 2007 йилда Лопес Испания терма жамоасини бошқара бошлаганидан икки ой ўтгач, 2007 йилги Европа чемпионатида жамоа билан ғалабага эришган. 2008 йилги жаҳон чемпионатида у бошқарган испанлар 2-ўринни олган бўлса, 2010 йилги Европа чемпионатида яна чемпион бўлган.
Турнир ҳақида
14 сентябрь куни бошланган футзал бўйича жаҳон чемпионати Ўзбекистоннинг Андижон, Бухоро ва Тошкент шаҳарларида 6 октябрга қадар давом этди. Турнирда 24 жамоа иштирок этди. Ўзбекистон футзал бўйича ўзи мезбонлик қилаётган жаҳон чемпионати гуруҳ босқичининг сўнгги турида Коста-Рикага қарши учрашувда имкониятни бой берди. Жамоа гуруҳда сўнгги ўринни эгаллаб, турнирдаги иштирокини якунлади. Мусобақада Бразилия футзалчилари Аргентина устидан 2:1 ҳисобида ғалаба қозониб, олтинчи марта жаҳон чемпионига айланди.
2021 йили Литвада бўлган ва Португалиянинг чемпионлиги билан тугаган жаҳон чемпионатида Ўзбекистон ўз тарихидаги энг яхши натижани қайд этган — терма жамоа гуруҳдан кейинги босқичга чиққан, аммо чорак финал учун ўйинда Эронга мағлуб бўлган.
