Ўзбекистонда марбург вируси иситмасини олдини олиш ва унинг эҳтиёт чораларини кучайтириш мақсадида чора-тадбирлар кўрилмоқда, дея хабар қилди Санитария-эпидемиологик осойишталик ва жамоат саломатлиги хизмати.
29 сентябрь куни Жаҳон соғлиқни сақлаш ташкилоти Африка қитъасидаги Руанда давлатида Марбург геморрагик иситмаси қайд этилганини маълум қилган. 28 сентябрь ҳолатига Руанданинг 30 та округининг еттитасида жами 26 та тасдиқланган ҳолат рўйхатга олинган ва шундан 6 та ҳолатда ўлим қайд этилган.
ЖССТ ушбу эпидемия хавфини миллий даражада жуда юқори, минтақавий даражада юқори ва бутун дунё даражасида паст деб баҳоламоқда.
СЭСнинг билдиришича, Ўзбекистонда бу касаллик бўйича «жиддий хавотирга ўрин йўқ». Давлат чегарасини кесиб ўтиш жойларида фаолият юритаётган санитария назорат пунктларининг (СНП) ҳушёрлиги оширилган.
Хусусан, марбург иситмаси билан касалланишни олдини олиш мақсадида касалликка гумон қилинганларни ўз вақтида аниқлаб, изоляторларга алоҳидалаш белгиланган. Шунингдек:
- гумон қилинган беморлар билан мулоқотда бўлган тиббиёт ходимлари томонидан стандарт эҳтиёт чораларини кўриш, қўшимча равишда инфекцияни юқтиришини олдини олишга қаратилган шахсий ҳимоя воситаларидан тўлиқ фойдаланиш;
- гумон қилинган беморларнинг қонига тегмаслик, бемор ажратган тана суюқликлари, шунингдек улар билан ифлосланган юзалар билан мулоқотда бўлмаслик;
- касалликнинг этиологияси, клиникаси, лаборатор ташхиси ва касалликни олдини олиш ва профилактикаси бўйича тиббиёт ходимларининг малакасини ошириш;
- касалликни назорат қилишда хавфсиз инъекция усулларини қўллаш, шахсий ҳимоя воситаларидан тўғри фойдаланиш, қайта ишлатилаётган тиббий асбобларни зарарсизлантириш ва чиқиндиларини хавфсиз йўқ қилиш.
Бундан ташқари, инфекция бўйича аҳолини хабардорлигини ошириш мақсадида улар орасида тушунтириш ва тарғибот ишларини амалга ошириш каби чоралари тизимли равишда амалга оширилмоқда, дейилади хабарда.
Марбург вируси (Marburg Marburgvirus, MARV) — филовируслар турига киради. Филовирусларнинг (лотинча. filum — тола) бундай аталишига сабаб, уларга микроскоп остида қаралса, улар тола кўринишига ўхшаш шаклга эга эканлигини кўриш мумкин. Филовируслар оиласининг энг машҳур вакили — бу Эбола. Демак, Марбург вирусини Эбола вирусининг қариндоши дейиш мумкин. MARVʼнинг бир-биридан генетик жиҳатдан ва таъсир қилиш даражасига кўра фарқ қилувчи бир нечта тури мавжуд.
Марбург вируси қачон ва қандай пайдо бўлгани, қандай йўл билан юқиши мумкинлиги, қанчалик хавфлилиги, шунингдек, унга қарши дори воситалар ёки вакцина ҳақида бу ерда ўқиш мумкин.
