Транспорт вазири ўринбосари Жасурбек Чориев жума куни Hyundai Rotem’га тегишли (Жанубий Корея) Global Rail Group компанияси раҳбари Квак Чоль Хун бошчилигидаги делегация вакиллари билан учрашди.
Транспорт вазирлиги матбуот хизмати хабарига кўра, йиғилишда Ўзбекистонда замонавий электропоездлар ишлаб чиқаришни маҳаллийлаштириш лойиҳаси муҳокама қилинди.
Бугунги кунда Жанубий Кореянинг KORAIL компанияси томонидан эксплуатация қилинаётган электропоездлар турини маҳаллийлаштириш орқали ишлаб чиқариш таклифи юзасидан тақдимот ўтказилди.
Маҳаллийлаштириш асосида ишлаб чиқарилиши кўзда тутилган электропоездларининг асосий техник хусусиятлари бўйича маълумотлар тақдим этилди.
Томонлар лойиҳанинг қўшимча имкониятларини кўриб чиқиш, таклифни таҳлил қилиш ва янги ишлаб чиқариш майдонларини ўрганишга келишиб олди.
Эслатиб ўтамиз, июнда Корея Республикаси президенти Юн Сок Ёлнинг ташрифи чоғида «Ўзбекистон темир йўллари», «Темирйўлэкспресс» ва Hyundai Rotem компаниялари ўртасида янги «Тошкент — Урганч — Хива» тезюрар йўналиши учун олтита электропоезд етказиб бериш ва уларга техник хизмат кўрсатиш бўйича шартнома имзоланган эди.
Август ойида президент олтита Hyundai Rotem поезди харид қилиш лойиҳасининг техник-иқтисодий параметрларини тасдиқлаган эди. Кореянинг Эксимбанки 40 йилга 185,18 миллион евро миқдорида кредит беради.
Шавкат Мирзиёев таклифи билан электропоезд «Жалолиддин Мангуберди» деб номланади. У ишга туширилгач, Тошкентдан Хивага 7 соатда (ҳозирда ярим кундан кўпроқ) етиб бориш мумкин бўлиши кутилмоқда.
