Ўзбекистон миллий терма жамоаси яримҳимоячиси Отабек Шукуров 2026 йилги Жаҳон чемпионати саралашининг 3-босқичи доирасидаги БААга (1:0) қарши ўйиндан сўнг ўз журналистларнинг саволларига жавоб берди.
Сўзбошида Шукуров ЖЧ босими сабаб ўйин қийин бўлганини таъкидлади.
«Жуда ҳам хурсандмиз. Алҳамдулиллаҳ 3 очко олдик. Жуда ҳам қийин ўйин бўлди. [Жаҳон чемпионати саралаши] босими барча гуруҳлардаги жамоаларга таъсир қилмоқда. Жуда кўп вазият яратяпмиз, лекин улардан фойдалана олмаяпмиз, шу сабаб сал қийинроқ ўйин бўлди. Нима бўлган тақдирда ҳам 3 очкони қўлга киритдик. Биз фақат натижа учун ўйнаяпмиз. Ҳар бир очко бизни Жаҳон чемпионатига яқинлаштиради. Мухлисларга катта раҳмат. Қўллаб-қувватлашда ва дуо қилишда давом этинг. Иншааллоҳ, жаҳон чемпионатига чиқамиз», — деди Шукуров матбуот анжумани аввалида.
Журналистнинг мураббий йўқлиги ўйинга таъсир қилиши ёки қилмаслиги ҳақидаги саволига Отабек қуйидагича жавоб берди.
«Албатта, таъсир кўрсатади. Лекин пенальти бўлмаганда ундай бўларди, бундай бўларди дейиш [нотўғри], кўп нарса бўлиши мумкин эди. Ўтган сафар Эрон билан дуранг ўйнаганимизда ҳам [танқид қилишди]. Тўғри улар 1 киши кам қолди, лекин нима бўлганда ҳам у Эрон. Ҳар доим жаҳон чемпионатига чиққан жамоа. Жаҳон рейтингда ҳам 20-ўрин атрофида бўлса керак, биз-чи? 60-поғонадамиз. Эрон қизил олгунича бизга гол урдими ёки охирги икки ўйинда бизни ютдими? Ўша нарсаларга ҳам озроқ эътибор бериш керак», — деди Шукуров.
Отабек Шукуров мақсад чиройли ўйин эмас, натижа эканини қайд этди.
«Журналистлар томонидан фақат негатив бўляпти. Шу нарсани тушуниш керакки, биз фақат натижа учун ўйнаймиз, чиройли футбол учун эмас. Чиройли футбол ўйнаганмиз, мен ўзим икки марта Жаҳон чемпионати йўлланмасини ютқизганман… Ҳозир биз гуруҳда юқори ўриндамиз, ўша нарсани қадрлаб, ўша нарсани қўллаб қувватлашингизни сўрайман», — деди футболчи.
Ўйинда пенальти белгиланганда дастлаб тўпни Жалолиддин Машарипов қўлга олиб, кейин Отабек Шукуровга бергани ҳақида савол берилди. Шукуров аввалдан пенальтини ўзи тепиши аниқ бўлганини айтди. Шунингдек, пенальтида тўп дастлаб тўцинга текканида нималар ҳис қилганини сўзлаб берди.
«Ичимдагини айтаман, мен у тарафга тепмоқчи эмасдим. Дарвозабон «Ал-Айн»нинг посбони. «Шаржа» жамоасида ўйнаганимда у дўстим бўлган. У мени қаерга тепишимни билади. Тўпни чап тарафга тепмоқчи эдим, аммо тепаётганимда дарвозабон ўша томонга (чапга) кетаётганини кўриб, йўналишни ўзгартиришга ҳаракат қилдим. Шунинг учун сал хавфли бўлди. Ўзимнинг ҳам юрагим тушиб кетди», — деб кулади Шукуров.
Эслатиб ўтамиз, футбол бўйича Ўзбекистон миллий терма жамоаси Жаҳон чемпионати саралашининг 3-босқичи доирасида 4-тур ўйинида БААни 1:0 ҳисобида енгиб, «А» гуруҳида 10 очко билан 2-ўринда кетмоқда. Биринчи ўриндаги Эронда ҳам 10 очко, лекин тўплар нисбати яхшироқ. Уларнинг таъқибчилари БАА ва Қатар етакчилардан 6 очколик фарқ билан учинчи ва тўртинчи ўринда кетмоқда. Қирғизистонда 3 очко, КХДРда эса 2.
Маълумот учун, саралашнинг ушбу босқичида 3 та гуруҳда биринчи ва иккинчи ўринни олган жамоалар Жаҳон чемпионатига тўғридан-тўғри йўлланма олади.
