Украина президенти Владимир Зеленский Олий радага ўзининг «ғалаба режаси»ни тақдим этди, унинг сўзларига кўра, режа Украина позицияларини мустаҳкамлаш ва Россия билан урушни адолатли тугатишга қаратилган. Бу режанинг биринчи оммавий тақдимоти ҳисобланади.
«Агар биз ҳозирданоқ «ғалаба режаси»ни амалга оширишни бошласак, кейинги йилга қадар урушни тугатишимиз мумкин», — деди Зеленский.
Режа беш банд ва учта махфий иловадан иборат.
Биринчи пункт — Украинани НАТОга «ҳозир» таклиф қилиш.
«Биз учун Украина ва НАТО масаласидаги қатъийлик Украина учун Европа интеграцияси муқаррарлигини ва Украинада демократияга муқобил йўқлигини ҳам англатади. Шунинг учун ҳам бу «ғалаба режаси»нинг бошланғич пункти», — деди Зеленский.
Унинг сўзларига кўра, Украина НАТОга аъзолик «ҳозирги кун эмас, келажак масаласи» эканини тушунади. «[Россия президенти Владимир] Путин ўзининг геосиёсий ҳисоб-китоблари ютқазаётганини кўриши керак», — дея қўшимча қилди у.
Иккинчи пункт — мудофаа. Зеленскийнинг сўзларига кўра, ушбу бандни амалга ошириш Россия ҳудудидаги операцияларни давом эттириш, Украина ҳаво мудофаасини кучайтириш, дронлар ва ракеталардан фойдаланишни кенгайтириш ва Ғарб иттифоқчиларининг Россия ҳудудига зарба бериш бўйича чекловларини олиб ташлаш, шунингдек, разведкадаги иттифоқчиларга кириш имкониятини назарда тутади.
«Бу ҳақиқатга тўғри келади — Украинадаги жанг майдонида ўз позицияларимизни ҳимоя қилиш ва шу билан бирга урушни Россия ҳудудига қайтариш, шунда россияликлар уруш нима эканини тушуна бошлайди ва — Россия пропагандасига қарамай — Кремлга нисбатан нафрати уйғона бошлайди», — деди Зеленский.
Учинчи пункт — ушлаб туриш. Украина ўз ҳудудида Украинани Россиядан келадиган ҳар қандай ҳарбий таҳдиддан ҳимоя қилиш учун етарли бўлган кенг қамровли ноядровий стратегик тўхтатувчи пакет жойлаштиришни таклиф қилмоқда.
Зеленский бу таклифни «куч орқали тинчлик» деб атади.
Унинг аниқлик киритишича, ушбу бандда АҚШ, Буюк Британия, Франция, Италия ва Германия етакчилари аллақачон олган махфий илова бор.
Тўртинчи пункт — Украинанинг иқтисодий салоҳиятини ривожлантириш. Зеленский Украинада табиий ресурслар, жумладан, триллионлаб долларлик муҳим металлар тўпланганини эслатди. Булар, хусусан, уран, титан, литий, графит ва бошқа стратегик жиҳатдан қимматли ресурслар бўлиб, улар «глобал рақобатда ё Россия ва унинг иттифоқчиларини, ё Украина ва демократик дунёни мустаҳкамлайди».
Унинг таъкидлашича, Украинанинг муҳим ресурс конлари, шунингдек, мамлакатнинг глобал аҳамиятга эга бўлган энергия ва озиқ-овқат ишлаб чиқариш салоҳияти Россиянинг урушдаги асосий мақсадларидан бири ҳисобланади.
Зеленскийнинг сўзларига кўра, Киев АҚШ ва ЕИга Украинада мавжуд бўлган муҳим ресурсларни биргаликда ҳимоя қилиш, биргаликда сармоя киритиш ва тегишли иқтисодий салоҳиятдан фойдаланиш бўйича махсус келишув тузишни таклиф қилмоқда. «Бу ҳам куч орқали тинчликдир. Иқтисодий куч», — деди у.
Бешинчи пункт урушдан кейинги даврга мўлжалланган. Зеленскийнинг қайд этишича, урушдан кейин украиналик ҳарбийлар ўз тажрибасидан НАТО ва Европа мудофаасини кучайтириш, шунингдек, Европадаги Америка контингентининг бир қисмини алмаштириш учун фойдаланиши мумкин.
«Дунёдаги ҳамма Россия ҳалол тинчликни қидирмаётганини кўриб турибди. Путин ақлдан озган ва фақат урушни хоҳлайди. У ўзгармайди… Аммо биз, украиналиклар ва шерикларимиз биргаликда уруш тугаши учун вазиятни ўзгартиришимиз керак. Путин нимани хоҳласа ҳам. Биз ҳаммамиз вазиятни ўзгартиришимиз керак, шунда Россия тинчлик ўрнатишга мажбур бўлади», — деди Зеленский.
«Россия Украина устидан назоратни абадий йўқотиши ва ҳатто бундай назоратга бўлган истагини йўқотиши керак. Бу Украина учун ҳаёт кафолати. Ва шу билан бир вақтда — Европа учун тинчлик кафолати», — деб ёзди у кейинчалик Telegram каналида.
Владимир Путиннинг матбуот котиби Дмитрий Песков Зеленскийнинг «ғалаба режаси»ни изоҳлар экан, Украина учун ҳақиқий тинчлик режаси Украина расмийлари олиб бораётган сиёсатнинг бефойдалигини англаш бўлишини айтди. У, шунингдек, Украинани «ҳушёр бўлишга» ва ҳарбий можарога олиб келган сабабларни тушунишга чақирди.
