Украина президенти Владимир Зеленский The Financial Times`га (FT) берган интервьюсида ўз мамлакатини НАТОга таклиф қилишни Россия билан урушни тугатишнинг ягона йўли деб атади.
«Биз урушни тугатиш учун дипломатик саъй-ҳаракатларимизни кучайтирадиган таклифсиз жуда кучли бўла олмаймиз», — деди у FT`га. «Бу уруш Путин яккаланиб қолганда ва бошқа шериклар уни дипломатия сари ундагандагина тугайди».
«НАТОга таклиф халқимиз ва аскарларимиз руҳиятини оширади, деди Зеленский. — Таклиф — НАТО томон яна бир қадам, бу эса уларнинг фарзандлари ўлмайди, дегани. Ҳеч қачон, чунки биз НАТО аъзоси бўламиз. Агар НАТОга таклиф ололмасак, руҳий ҳолат тушади».
Зеленский Украинанинг НАТОга аъзолиги ҳақидаги баҳсни Киевни Patriot ракета тизимлари ёки F-16 қирувчи самолётлари билан таъминлаш муҳокамасига қиёслади, ўшанда Ғарбдаги иттифоқчилар аввалига рад жавобини бериб, кейин рози бўлган.
НАТОга таклиф Зеленский шу ҳафта биринчи марта оммага тақдим этган Украинанинг «ғалаба режаси»даги беш банддан биринчиси. Унинг қайд этишича, бу қадам Европа интеграцияси муқаррарлигини ва Украинада демократияга муқобил йўқлигини ҳам англатади.
««Ғалаба режаси»га муносабат Patriots, F-16 ники билан бир хил… Лекин биз буни қилишимиз керак. Бу омон қолишнинг ягона йўли», — деди Зеленский Ғарбнинг унинг режасига бўлган сокин муносабатини изоҳлар экан. «Путин урушни тугатиш кераклигини ҳис қилмагунча у тугамайди. У эса фақат кучни тушунади».
Украина раҳбарининг айтишича, Киев НАТОга аъзо бўлиши эвазига босиб олинган ҳудудларни Россияга бериши ҳақидаги назарий келишувни муҳокама қилаётган Ғарб расмийлари бу ҳақда Украина раҳбариятига «ҳеч қачон айтмаган». У уларга масалани «учинчи томон орқали» айтишни эмас, балки «очиқ столга қўйишни» таклиф қилди. «Биз билан гаплашинг», — деб қўшимча қилди Зеленский.
Украина президенти, шунингдек, бошқа давлатларнинг тинчлик режалари «ҳақиқий» бўлса ва Киевнинг саъй-ҳаракатларига путур етказмаса, уларга очиқ эканини таъкидлади. «Бразилия, режангиз борми? Ажойиб. Хитойдан келган таклиф — қаршилигимиз йўқ… Лекин йигитлар, илтимос, бизни ажратиб қўйманглар», — деди Зеленский.
- Украина Россиянинг кенг миқёсли босқинидан кейин 2022 йилда НАТО ва ЕИга аъзо бўлиш учун ариза берганди. Вашингтонда ўтказилган НАТОнинг сўнгги юбилей саммитида иштирокчи давлатлар якуний декларацияда Украина Шимолий Атлантика алянсига қўшилиш учун ортга қайтмас йўлдан бораётганини таъкидлади, бироқ Киев таклиф олмади. Хусусан, Украинанинг қўшилишига қарши бўлган АҚШ ва Германия Россия билан зиддият кучайишидан хавфсирамоқда.
