Ўзбекистон «Rowing&canoe» федерацияси спортчиси Шоҳмурод Ҳолмуродов 2024 йилги текширув даврида топширган допинг синамасида спортда тақиқланган «Кломифен» моддаси борлиги аниқланди. Миллий антидопинг агентлиги спортчини 3 йилга дисквалификация қилди. «Газета.uz» ҳолат бўйича Шоҳмурод Ҳолмуродовнинг мураббийи Серик Мербеков билан суҳбатлашди.
Шоҳмурод Ҳолмуродов Хитойнинг Ханчжоу шаҳрида ўтган XIX Осиё ўйинларида олтин медални қўлга киритган. Ўшанда каноэда эшкак эшиш бўйича эркаклар ўртасида 1000 метрга сузиш баҳсида Шоҳмурод Холмуродов ҳамда Нурислом Тўхтасин ўғли жуфтлиги 1-ўринни олганди.
Спортчи Бутунжаҳон антидопинг кодексининг 2.1 қоидаси (Тақиқланган модда ёки унинг метаболитлари ва маркерлари спортчи анализида мавжудлиги)ни бузгани аниқланди. У кодекснинг 10.2.1 бандига асосан 3 йил муддатга дисквалификация қилинди.
Мураббийнинг айтишича, Шоҳмурод Ҳолмуродовдан 2024 йил 7 мартдаги ўқув машғулот йиғинида допинг назорати бўйича анализ олинган.
«Уларнинг барчаси Анталияда ўтган ўқув-машғулот йиғинидан қайтганди. Ундан сўнг тиббий муолажа олганди. Кейин допингга тест топширди. 1 апрелда тест жавоби чиқди, унинг қонида спортда тақиқланган „Кломифен“ моддаси бор экан. Қарор майда чиқди, уни федерацияга юборганман. Спортчи 3 йилга спортдан четлаштирилди. Бу Осиё ўйинлари вақтида аниқланмаган», — деди у.
Спортчи мазкур моддани муолажа вақтида билмасдан қабул қилганини тан олган. Унга 4 йил беришмоқчи эди, муолажа қилгани учун 3 йил беришди, дейди мураббий.
Қоидаларга кўра, дисквалификация қилинган спортчи жазо муддати тугагунга қадар халқаро ва миллий тоифадаги мусобақалар ва ўқув-машғулот йиғинларида иштирок этмайди. Агар юқоридаги талаблар бажарилмаса, унга умрбод дисквалификация муддати қўлланилиши мумкин. Шунингдек, кодексда спорт федерацияси ёки ассоциациясига нисбатан ҳам жазо чораси қўллаш мумкинлиги белгиланган.
Мураббийнинг таъкидлашича, бу чеклов унинг аввалги мусобақалардаги натижасига таъсир қилмайди. У Хитойда ўтган Осиё ўйинларида олган олтин медали учун ойлик олишда давом этади. Ҳозир уй шароитида машғулот ўтказяпти. Лекин, мусобақаларга чиқолмайди.
Спортчи айни допинг сабабли Ўзбекистонда ўтган 2024 йилги жаҳон чемпионатини ҳам ўтказиб юборди. У ҳам жуфтлик баҳсларида қатнашиши керак эди, дея таъкидлади Шоҳмурод Ҳолмуродовнинг мураббийи.
