ФИФА 24 октябрь куни ўзининг терма жамоалар бўйича рейтингини янгилади. Унга кўра Ўзбекистон миллий терма жамоаси 2 поғонага юқорилаб, 1429,26 очко билан 58-ўринда қайд этилди.
Скрин: Fifa.com
Миллий терма жамоа Осиёда Япония (15-ўрин, умумий рейтингда 1 поғонага юқорилади), Эрон (19, ўзгаришсиз), Жанубий Корея (22, +1), Австралия (24, +1), Қатар (46, -2) ва Ироқдан (56, -1) кейин 7-ўринда бормоқда.
Ўзбекистон 19 сентябрдан 24 октябргача 16,2 очко жамғарган. Бу даврда ўзбекистонлик футболчилар Жаҳон чемпионати саралашининг 3-босқичи доирасида ўз уйида Эрон билан дуранг ўйнади (0:0) ва БААни мағлуб этди (1:0).
Рейтингни Аргентина, Франция ва Испания терма жамоалари бошқариб бормоқда. Кучли ўнликдан, шунингдек, Англия, Бразилия, Бельгия, Португалия, Нидерландия, Италия ва Колумбия жой олган.
Ўзбекистон миллий терма жамоаси ФИФА рейтингидаги энг юқори натижаси 45-ўрин бўлган. У бу ўринда 2006 йил 22 ноябрдан то 2007 йилнинг 14 февралгача бўлган. Энг паст натижаси эса 1996 йил ноябрь ойида қайд этилган — 119-ўрин.
