Сенатнинг эллик тўққизинчи ялпи мажлисида «Ўзбекистон Республикасининг Жиноят-процессуал кодексига қўшимчалар ва ўзгартириш киритиш тўғрисида»ги қонун муҳокамаси бўлиб ўтди.
Қонун орқали Ўзбекистон Республикаси Жиноят-процессуал кодексининг 29 ва 542-моддаларига тегишли ўзгартиришлар киритилмоқда ҳамда янги 66-боб билан тўлдирилмоқда.
Кодекснинг 29 ва 542-моддаларида озодликдан маҳрум этилган шахсларни жазони ўташни давом эттириш учун, шунингдек, руҳий касалликка чалинган шахсларни мажбурий даволаш учун бериш ва қабул қилиш асосларини тартибга солувчи қоидалар белгиланмоқда.
Бундан ташқари, кодексга киритилаётган янги 66-боб 13 та моддани ўз ичига олиб, унда хорижий давлат судининг қарорини тан олиш ва ижрога қаратиш, озодликдан маҳрум этилган шахсни жазони ўташни давом эттириш учун, шунингдек, ўзига нисбатан тиббий йўсиндаги мажбурлов чораси қўлланилган шахсни мажбурий даволашни давом эттириш учун қабул қилиб олиш ва хорижий давлатга беришнинг асослари, шартлари, кўриб чиқиш ва альтернатив жазо тайинлаш тартиби ҳамда рад этиш сабаблари қайд этилган.
Унга кўра, маҳкумни топшириш ва қабул қилиш унинг қонуний вакилининг ёки яқин қариндошининг аризасига, шунингдек, қабул қилинаётган шахснинг ёки унинг қонуний вакилининг розилиги билан Ўзбекистон Бош прокуратурасининг ёки хорижий давлат ваколатли органининг сўровига кўра йўл қўйилиши белгиланмоқда.
Шу билан бирга, қонунга асосан маҳкумни қабул қилиб олиш тўғрисидаги масалани кўриб чиқиш қуйидаги тартибда амалга оширилади.
Озодликдан маҳрум этилган шахс ёки тиббий йўсиндаги мажбурлов чораси қўлланилган шахс томонидан мурожаат йўллангандан сўнг Бош прокуратура мазкур шахснинг фуқаролиги тасдиқлангандан кейин хорижий давлатнинг ваколатли органига масалани ҳал этиш учун зарур бўлган ҳужжатларни тақдим этиш тўғрисида сўров юборади. Сўров қаноатлантирилган тақдирда, Бош прокурор ёки унинг ўринбосари мазкур шахсларни қабул қилиш тўғрисида қарор қабул қилади.
Шундан кейин Ўзбекистон бош прокурори ёки унинг ўринбосари хорижий давлат судининг қарорини тан олиш ва ижрога қаратиш тўғрисида судга илтимоснома киритади. Киритилган илтимоснома маҳкум яшаш жойига тегишли бўлган судья томонидан кўриб чиқилади. Судья жазони ўташ учун халқаро шартномаларга мувофиқ хорижий давлат томонидан топширилган маҳкумга нисбатан жазо муддати хорижий давлат судининг ҳукми билан тайинланган муддатга мутаносиб равишда жазо тайинлайди.
Шунингдек, мазкур қонун орқали озодликдан маҳрум этилган шахсни жазони ўташни давом эттириш учун, ўзига нисбатан тиббий йўсиндаги мажбурлов чораси қўлланилган шахсни мажбурий даволашни давом эттириш учун хорижий давлатга беришни рад этишнинг асослари аниқ белгилаб қўйилмоқда.
