Корхоналар ва ташкилотларнинг ягона давлат регистри (КТЯДГ) маълумотларига кўра, давлатга тегишли «Пойтахт банк» хусусийлаштирилди.
Молиячи Отабек Бакиров Марказий банк «Пойтахт банк»ни хусусий банклар тоифасига ўтказганига эътибор қаратди.
Август ойида «Пойтахт банк» давлат банклари қаторига киритилган ва Тошкент ҳокимлигига қарашли бўлган бўлса, сентябрь ойида у хусусий банклар рўйхатида жойлашган.
Poytaxt Bank’нинг янги таъсисчиси 100% акцияларга эгалик қилувчи амирликларнинг Bond Investments Limited компанияси бўлди.
Эслатиб ўтамиз, бу Ўзбекистонда «Ипотека-банк» , «Ўзагроэкспортбанк» ва Asia Alliance Bank’дан (миллийлаштирилганидан сўнг у яна хусусийлаштирилди) кейинги давлат банкини хусусийлаштириш бўйича тўртинчи битим ҳисобланади.
Июнь охирида Давлат активларини бошқариш агентлиги БААнинг Bond Investments limited компанияси билан банкнинг 100% улушини 10 миллион долларга тўловни бирйўла амалга ошириш шарти билан сотиш бўйича келишувга эришганини маълум қилганди.
«Инвестор Бирлашган Араб Амирликларининг юқори суръатларда ривожланаётган инвестиция компанияларидан бири бўлиб, Das Holding LLC компанияси гуруҳи таркибида фаолият юритади. Холдинг гуруҳи Яқин Шарқ ва бутун дунёдаги диверсификацияланган бизнес соҳаларида фаолият юритувчи компаниялардан иборат. Таъкидлаш лозимки, холдинг гуруҳи БААда исломий ва рақамли банкни ўз ичига олган муваффақиятли банкларни ташкил этиш ва уларнинг фаолиятини юритиш тажрибасига эга. Ушбу тажриба Ўзбекистон банк секторида татбиқ этишга хизмат қилади», — деб ёзганди ДАБА матбуот хизмати.
Давактив битимни қонуний асосларда тўлиқ якунлаш учун инвестор «Пойтахт банк» акцияларини сотиб олиш мақсадида Марказий банкдан дастлабки рухсатномани олиши зарурлигини таъкидлаганди.
Spot Bond Investments Limited ўз веб-сайтига эга эмаслигини ёзганди. ДАБА инвестор Das Holding тузилмасининг бир қисми эканини даъво қилишига қарамай, бу ҳақда ҳеч қандай очиқ маълумот топилмаган.
25 июль куни Марказий банк бошқаруви раиси Мамаризо Нурмуратов «Пойтахт банк»ни сотиш бўйича битимни тасдиқлаш ниятида эканини маълум қилганди. БАА холдингини ўргангач, регулятор потенциал инвестор талабларга жавоб беради, деган хулосага келди, дея таъкидлаган у.
«Пойтахт банк» акционерлик тижорат турар жой-қурилиш жамғарма банки 2018 йил охирида ўз фаолиятини бошлаган. Унинг асосий вазифалари аҳоли ва юридик шахсларнинг уй-жойга бўлган эҳтиёжини қондириш бўйича ипотека кредити ва банк хизматларини кўрсатиш, шунингдек, арзон кўп қаватли уйлар қураётган пудратчиларга кредитлар беришдан иборат эди. Банк 2021 йилнинг май ойида сотувга қўйилган.
