19 октябрь куни ижтимоий тармоқларда номаълум аёлнинг чўлда бир эркак томонидан калтакланиб, «самосуд» қилинаётгани акс этган видео тарқалди. Навоий вилояти ИИБнинг 23 октябрь куни «Газета.uz»га берган маълумотига кўра, ушбу ноқонуний хатти-ҳаракатларни содир этган шахс қамоққа олинган.
Ижтимоий тармоқларда тарқалган тасвирларда эркак аёлни таёқ билан ураётгани ва уни қўрқитгани кўринади. Жараён эркакнинг ўзи томонидан тасвирга олинган. Воқеа айнан қачон содир бўлганига аниқлик киритилмаган.
Видеода эркакнинг: «Яхшилаб йиғла, жонингдан умидинг бўлса, ялин! Видеони отангга кўрсатаман: „Қизингнинг аҳволини кўр. Икки соатдан бери шу ерда уряпман“, [деб]. Шу ўрмон жойни ҳам эслаб қол — шу ерда кўмиласан», деган сўзлари эшитилади. Аёл бунга жавобан ундан ортиқ урмасликни илтимос қилади ва унинг ҳамма айтганларини қилишга тайёрлигини айтади.
Навоий вилояти ИИБ матбуот хизматидан «Газета.uz»га маълум қилишларича, гумонланувчига нисбатан Жиноят кодексининг 112-моддаси (ўлдириш ёки зўрлик ишлатиш билан қўрқитиш) ва 138-моддаси (зўрлик ишлатиб ғайриқонуний равишда озодликдан маҳрум қилиш) билан жиноят иши қўзғатилган ҳамда у қамоққа олинган.
Тармоқларда тарқалган хабарларда, шунингдек, жабрланувчининг ўзи берган бир интервьюда ҳуқуқбузар шахс ички ишлар органларининг собиқ ходими экани таъкидланган.
«Ушбу жиноятни содир этган фуқаронинг ички ишлар органларига ҳеч қандай алоқаси йўқ. Ҳозирда ҳолат юзасидан суриштувлар давом этмоқда. Якуни бўйича қўшимча маълумотлар берилади», дейилади Навоий вилоят ИИБнинг «Газета.uz»га тақдим этилган ахборотида.
