Ўзбек ютуберлари инглиз тили каби талабгор тилларда кўпроқ контент қилса, яхши даромад топади. Бу ҳақда Тошкентда бўлаётган «Халқаро ҳамкорлик ташаббуслари ҳафталиги» доирасида 23 октябрь куни Рақамли технологиялар вазири Шерзод Шерматов ОАВ вакилларига берган интервьюсида айтиб ўтди, дея хабар бермоқда «Газета.uz» мухбири.
Шерзод Шерматов журналистларнинг Ўзбекистонда YouTube монетизациясига қўйилган чеклов қачон олиб ташланиши ҳақидаги саволига қуйидагича жавоб қайтарди:
«Менинг тавсиям — YouTube’да кўпроқ четга ишлашга ҳаракат қилиш керак. Чунки монетизациянинг инглиз тилида контенти жуда катта. Масалан, Марғилонга борганимда Инҳа университетини битирган талабамизни кўриб қолгандим. У ўзининг YouTube каналида 3D принтерлар рендерини «обзор» қилиб беради. Бир каналига кириб кўринг, «рилс»лари 30 миллион марталаб кўрилган. Чунки инглиз тилидаги аудитория жуда катта. Шунинг орқасидан ойига ўртача 5 минг доллар даромад топяпти. Сиз ўзбекча контент қилиб қанча даромад топа оласизу, инглизча контент тайёрлаб қанча даромад топасиз? Шунинг учун тайёр ишлаб турган монетизация механизмидан кўпроқ фойдаланиш керак», — деди у.
Ҳукумат вакили инглиз тили сингари талабгор тилларда кўпроқ контент қилиш кераклигини таъкидлади. «Менинг таклифим шу. Бизда қачон монетизация очилишини компаниядагиларнинг ўзи режа қилиб, ҳаракат қилади», — деди Шерматов.
Эслатиб ўтамиз, аввалроқ Ўзбекистонда яқин келажакда YouTube монетизациясига қўйилган чеклов олиб ташланиши мумкинлиги айтилган эди. Бу борада платформа раҳбарига мурожаат қилингани таъкидланган.
