Шавкат Мирзиёев 25 октябрь куни Тошкентнинг Бобур кўчасида пойтахт халқаро аэропортига олиб борувчи йўл ўтказгични ишга тушириш маросимида иштирок этди. Бу ҳақда давлат раҳбари матбуот хизмати хабар берди.
Ўтиш жойининг ярми ўтган йилнинг ноябрь ойида очилган эди. Ўшанда йўл ўтказгичнинг мустаҳкамлигини синаш учун у бўйлаб умумий оғирлиги 300 тонна бўлган ҳарбий танклар ва тиркамалар ташилган.
Йўл ўтказгичнинг умумий узунлиги 702 метр, эни 46 метрни ташкил этади. Кичик ҳалқа йўли ва Содиқ Толипов кўчасига туташган иккита айлана ва тўртта ёйсимон чиқиш йўллари қурилди.
«Бу қайрилиб олишга ҳожат қолдирмай, автомобиллар ҳаракатини осонлаштирди. Умуман, ушбу транспорт боғламаси 1 соат ичида 5 мингта, бир кеча-кундузда 132 мингта автомобилни ўтказиш қувватига эга бўлди», — дейилади хабарда.
«Халқимиз кутиб турибди. Рухсат», — деди президент йўл ўтказгични фойдаланишга топшириш маросимида.
Йўл ўтказгичда биринчи марта муҳандислик иншоотларини мониторинг қилиш тизими жорий этилди. Бу кўприклардаги стратегик нуқталарда электрон узатгичлар ўрнатишни ўз ичига олади. Улар оқали мустаҳкамлик ва хавфсизлик даражаси доимий назорат қилиб борилади
«Кундалик меъёрдан ўзгариш сезилса, муаммо тезда аниқланиб, вақтида чора кўрилади. Бу кўприкларнинг узоқ вақт яхши сақланишини таъминлайди», — дейилади президент матбуот хизмати хабарида.
Шунингдек, бу тизим натижасида маблағ тежалади. 20 га яқин қоғоз шаклдаги ҳисоботлар рақамлаштирилади. Мониторинг маълумотлари 30 йилгача сақланади.
Президент бу тизимни аввал пойтахтдаги 114 та кўприкда ва кейинчалик барча кўприкларда татбиқ этиш зарурлигини таъкидлади.
Аэропорт яқинидаги темирйўл орқали ўтувчи йўл ўтказгич 1967 йилда қурилган. 2008 йилда бу ерда реконструкция ишлари олиб борилганди, натижада у тўрттадан олти қаторлигача кенгайтирилди (ҳар бир йўналишда учтадан).
Янги реконструкция ишлари ўтган йилнинг февраль ойида бошланган. Қайд этилишича, бу 463 миллиард сўмга (38 миллион долларга яқин) баҳоланмоқда.
