Уй-жой шароитини яхшилашга муҳтож бўлганларга 120 миллион сўмгача 20 йилгача муддатга ипотека кредити берилади. Кредитни бериш тартиби Вазирлар Маҳкамаси қарори билан тасдиқланди.
«Маҳалла еттилиги» тавсияси асосида камбағалликдан чиқариш дастурига киритилган ва уй-жой шароитини яхшилашга муҳтож бўлган шахсларга ипотека кредитини ажратиш тартиби тўғрисидаги низомга мувофиқ:
- якка тартибдаги уй-жойни куриш, реконструкция қилиш ва таъмирлаш максадлари учун Марказий банкнинг асосий ставкасидан тўрт фоиз бандга юқори ставкада 120 миллион сўмгача миқдорда, 20 йилгача муддатга ипотека кредитларини ажратилади;
- ипотека кредити бўйича дастлабки бадалнинг бир қисмини қоплаш учун ажратиладиган кредитнинг 15 фоизи микдорида хамда фоиз туловларининг бир қисмини қоплаш учун кредит муддатининг биринчи беш йили давомида 12 фоиздан ошган қисмига субсидия тўлаб берилади;
- ипотека кредитлари ва улар бўйича субсидияларни расмийлаштириш ҳамда ажратиш тартиби тасдиқланади.
Камбағалликдан чиқариш дастурига киритилган ва уй-жой шароитини яхшилашга муҳтож бўлган шахсларга ипотека кредитлари Иқтисодиёт ва молия вазирлигининг маблағлари ҳисобидан, қоида тариқасида, «Агробанк», «Халқ банки», «Микрокредитбанк» ва «Бизнесни ривожлантириш банки» томонидан ажратилади;
Шунингдек, камбағалликдан чиқариш дастурига киритилган ва уй-жой шароитини яхшилашга муҳтож бўлган шахсларга якка тартибдаги уй-жойни қуриш, реконструкция қилиш ва таъмирлашда кадастр паспортини расмийлаштириш ва кўчмас мулкка бўлган ҳуқуқларни давлат рўйхатидан ўтказиш билан боғлиқ тўловлар қиймати 50 фоизга камайтирилади.
Қарор билан якка тартибдаги уй-жойни қуриш, реконструкция қилиш ва таъмирлаш учун ажратилган ипотека кредитлари бўйича дастлабки бадал ва фоиз харажатларининг бир қисмини қоплаш учун субсидиялар «субсидйплатформ.мф.уз» тўлов платформаси орқали ажратилиши белгиланган.
Эслатиб ўтамиз, 30 апрель куни «2024 йилда ипотека кредитларини ажратиш механизмларини такомиллаштириш ва аҳолининг уй-жой шароитларини яхшилашга оид қўшимча чора-тадбирлар тўғрисида»ги президент фармони қабул қилинганди.
Фармонда ҳудудларда 100 мингта квартирадан иборат бўлган кўп қаватли уй-жойлар қурилиши ҳамда қурилиш ташкилотларига бозор тамойиллари асосида ажратилган кредитлар бўйича компенсация ва кафилликлар тақдим этилиши белгиланган.
