Ўзбекистондаги партиялар аҳоли билан ўзаро алоқаларни яхшилаш учун сиёсий технологияларнинг замонавий усулларини ўзлаштириши керак. Бу ҳақда 25 октябрь куни «Халқаро ҳамкорлик ташаббуслари ҳафталиги» доирасида Сенат раисининг биринчи ўринбосари Содиқ Сафоев маълум қилди, деб хабар бермоқда «Газета.uz» мухбири.
Сенатор журналистларнинг сайловчилар сифатида партиялар дастурларидаги фарқларни кўрадими, деган саволига шундай жавоб берди: «Биз ўтаётган, пропорционал ва мажоритар ёндашувларни ўз ичига олган янги сайлов тизими ҳар бир партиянинг ўз юзи ва позицияси борлигини кўрсатиши керак. Динамикасига назар солсак, ўтган йилги сайловларга нисбатан бу йил партиялар янада аниқроқ дастурларни илгари сураётганини кўриш мумкин».
«Партиялар орасида сиёсий технологиялардан фойдаланиш ва рақобатнинг кучайиши кўпроқ кўзга ташланади. Бу ижобий тенденция ва у ривожлантирилиши керак», — деди сенатор.
«Гап сайловлар ва танлаш имкониятлари ҳақида кетяпти. Сайловчилар, табиийки, кимга ва нима учун овоз бераётганини аниқ тушуниши керак. Ҳозир партиялар ўртасида илгари бўлмаган мунозаралар бўлиб ўтмоқда. Илгари халқимиз аниқ кишиларга овоз берган бўлса, бугун партияларни ҳам сайламоқда. Мен буни ўта ижобий жараён деб ҳисоблайман ва мен билан учрашган халқаро кузатувчилар ҳам буни қайд этишди», — деди Содиқ Сафоев.
У «сайловолди тарғибот-ташвиқот ишларида нималар ўзгаришини хоҳлаган бўлардингиз?» деган саволга қуйидагича жавоб берди: «Бизда сиёсий технологиялар билан шуғулланадиган компаниялар йўқ. Бу фан, бу санъат. Ўз дастурини сайловчилар онгига профессионал тарзда етказиш, ўз электоратига йўл топиш маълум бир партиянинг шарфи ёки кепкасини кийиш билан белгиланмайди. Бу соҳанинг ҳам ўз технологиялари бор».
«Келажакда сайлов жараёнлари ривожланиши билан партияларимиз замонавий сиёсий технологиялар усулларини ўзлаштириши ва шу орқали аҳоли билан ишлашни такомиллаштириши керак», — деди Сенат раҳбарининг биринчи ўринбосари.
Сиёсий технологиялар — бу сайлов кампанияларини ўтказиш, жамоатчилик фикрини шакллантириш ва сиёсий жараёнларга таъсир кўрсатиш каби мақсадларга эришиш учун қўлланиладиган усуллар ва воситалар йиғиндисидир. Жараён стратегиялар ишлаб чиқиш, оммавий ахборот воситалари, ижтимоий тармоқлардан фойдаланиш, шунингдек, сайловчилар ва жамоат ташкилотлари билан тўғридан-тўғри ҳамкорликни ўз ичига олади.
