Коррупцияга қарши курашиш агентлиги директори Акмал Бурханов Тошкент шаҳридаги 676-сайлов участкасига қизи билан бирга келиб, парламент сайловида овоз берди. Овоз бериб бўлгач, у «Газета.uz» мухбирига қисқа интервью берди.
— Акмал ака, нега депутатликка номзодингизни қўйишга қарор қилдингиз?
— Биринчидан, сайлов янгича тизимда, конституция бўйича фақат мажоритар эмас, балки пропорционал кўринишда ҳам ўтяпти. 75 та округда бевосита депутатликка номзодларга овоз берилса, қолган 75 та округда эса партия рўйхати асосида [сайлов бўлиб ўтади]. Менинг номзодимни «Адолат» социал-демократик партияси ўзининг партия рўйхатига киритган. Мен мана шу партиянинг вакили, уни қўллаб-қувватловчи шахс сифатида номзодим қўйилган. Қайсидир округ, қайсидир ҳудуддан эмас, балки партияни қўллаб-қувватловчи, партия лидерларидан бири сифатида номзодим киритилган.
Нима учун номзодингизни қўйдингиз, деган саволга келсак, биз ҳам сиёсий жараёнларга бефарқ эмасмиз. Ўзбекистонда катта ислоҳотлар кетяпти, лекин ҳали қиладиган ишларимиз кўп.
Мен парламентдан ҳам, ҳудудий кенгашлардан ҳам янги ғоя, янги ташаббусларни қонунчиликда акс эттиришни янада кўпроқ кутиб қолган бўлардим.
Айниқса, ўз соҳамдан келиб чиқиб айтадиган бўлам, коррупцияга қарши кураш йўналишда ҳам қилинадиган ишлар ҳали кўп. Парламент томонидан қабул қилиниши керак бўлган қонунлар, лойиҳалар жуда кўп.
— Ўтган муддатда ишлаган парламентда қайси жиҳатларидан кўнглингиз тўлди, қайси жиҳатларидан кўнглингиз тўлмади?
— Энг охирги чақириқ парламентга осон бўлмади. Чунки ўтган уч-тўрт йилдаги очиқлик сиёсати парламентга ҳам тааллуқли бўлди, яъни парламент йиғилишларининг барчаси жонли эфирларда узатилгани, депутатларнинг ҳар бир гапи жамоатчилик эътиборига тушгани жиҳатидан гапирсак, депутатларга осон бўлмади, дейиш мумкин.
Энг муҳими, бу чақириқ парламент жуда катта вазифани — давлатимизнинг энг муҳим, энг асосий қонуни ҳисобланган Конституцияни янги таҳрирда қабул қилиш вазифасини ҳам амалга оширди.
Умуман, коррупцияга қарши курашиш йўналишида парламент томонидан жуда муҳим қонунлар қабул қилинди. Жумладан, «Манфаатлар тўқнашуви тўғрисида»ги қонун, давлат харидларига тааллуқли қонунлар. Биз томондан илгари сурилган ташаббусларни ўтказгани учун, албатта, парламентга миннатдорчилик билдирамиз.
Албатта, оддий фуқаро сифатида, халқ вакили сифатида айтадиган бўлсам, парламент яна ҳам профессионал бўлишини, яна ҳам тажрибали бўлишини, яна ҳам фаол ишлаши тарафдоримиз, шунинг учун ҳам — янада ташаббускор, янада тажрибали парламент шаклланиши учун келиб овоз беряпмиз.
— Сизнинг тасаввурингизда парламент ва депутатлар қандай бўлиши керак? Янги чақириқ парламентдан нималар кутяпсиз?
— Депутат биринчи ўринда халқ вакили бўлиши керак, халқнинг овозини кўрсата оладиган бўлиши керак. Мана шу мутаносибликни сақлай олса, ҳақиқий халқчил парламент бўлади, депутатлар ҳам халқчил бўлади, энг аввало халқ, уларни сайлаган фуқаро уларга ишонади. Энг асосийси шу.
Иккинчиси — замон билан ҳамнафас бўлиши [керак]. Замонга мос, бугунги кундаги жамият талабларига мос қонунларни ўз вақтида қабул қила олса, мана шунда ҳақиқий парламент бўлади.
— Агар депутатлик мақомига эришсангиз, биринчи навбатда қайси масалаларга ечим топишга ҳаракат қиласиз?
— Масалалар жуда кўп: ижтимоий, иқтисодий, сиёсий. Албатта, ўз соҳамдан келиб чиқиб, суд-ҳуқуқ соҳасида, коррупцияга қарши курашиш борасида янги қонунларни, янги лойиҳаларни тезлаштиришга ҳиссамни қўшишга ҳаракат қиламан ва халқаро ҳамкорлик йўналишида ҳам кўпроқ Ўзбекистоннинг халқаро стандартларга интеграциялашув жараёнларини ҳам тезлаштириш бўйича саъй-ҳаракатларни амалга оширган бўлардим.
Энг муҳими, шу халқ учун муҳим бўлган халқчил қонунларни қабул қилиш чоралари кўрилади.
